ދިވެއްސަކަށް ދިވެހިބަސް ނޭނގޭތީވެ، ކްރިމިނަލް ކޯޓުގައި ކުރިއަށްދިޔަ ޝަރީއަތުގެ މަޖިލީހެއްގައި ތަރުޖަމާނެއްގެ އެހީ ހޯދައިފިއެވެ.

މައްސަލަ ރައްދުވާ ފަރާތްކަމަށްވާ އެމީހަކީ އުމުރުން 19 އަހަރުގެ ދިވެހި ފިރިހެނެކެވެ. ކްރިމިނަލް ކޯޓުގައި ކުރިއަށްދާ އަޑުއެހުމުގައި އެމީހާގެ މައްޗަށް ދައުވާކޮށްފައިވަނީ މަކަރާއި ހީލަތުން މީހެއްގެ އަތުން ފައިސާ ހޯދުމުގެ މައްސަލައެވެ. މި މައްސަލާގައި އޭނާ ހައްޔަރުކޮށްފައިވަނީ މިމަހުގެ 13 ވަނަ ދުވަހުއެވެ.

އޭނާގެ މައްޗަށް ތުހުމަތު ކުރަނީ މަކަރާއި ހީލަތުން މީހުންތަކެއްގެ އަތުން އެއްލައްކައަށްވުރެ ގިނަ ރުފިޔާ ހޯދައި އެކައުންޓަށް ޖަމާކޮށްފައިވުމެވެ. 

Advertisement

މި މައްސަލަ ރައްދުވާ ފަރާތުގެ ބަންދުގެ މުއްދަތު އިއްޔެ ހަމަވުމުން ބަންދުގެ މުއްދަތު ވަނީ 15 ދުވަސް އިތުރުކޮށްފައެވެ. ފުލުހުން އެންމެ ފުރަތަމަ އޭނާ ހައްޔަރުކޮށްފައިވަނީ މިމަހުގެ 13 ވަނަ ދުވަހުއެވެ. އެފަހަރު ބަންދުގެ މުއްދަތު ޖަހާފައިވަނީ 7 ދުވަހަށެވެ.

ކޯޓުތަކުގެ ޝަރީއަތުގެ މަޖިލީހުގައި މީގެކުރިންވެސް ބައެއް މީހުނަށް ރަނގަޅަށް ދިވެހިބަސް ނޭނގޭތީވެ ތަރުޖަމާނުންގެ އެހީ ހޯދާފައިވާކަން ފާހަގަކޮށްލެވެއެވެ. ކޯޓްތަކުގައި އާއްމުގޮތެއްގައި ތަރުޖަމާނުންގެ ބޭނުން ހިފަނީ ބިދޭސީ މީހުންނެވެ. ކްރިމިނަލް ކޯޓުގެ ހަރަދުތަކުގެ ރިޕޯޓަށް ބަލާއިރު، ބަސް ތަރުޖަމާކުރާ މީހެއްގެ ފީ އުޅެނީ 400 ރުފިޔާ އާއި 1400 ރުފިޔާ އާ ދެމެދުގެ އަގުތަކެއްގައެވެ.