ކުރިއަށް އޮތް ރަމަޟާން މަހުގެ ކުރިން ހއ.ތަކަންދޫ އާއި ހއ.މާރެންދޫގައި އާރުޓީއެލްގެ ހިދުމަތް ފަށާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، އެމަނިކުފާނު ހއ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހއ.ތަކަންދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުންނެވެ.

ދަތުރުފަތުރުކުރުމުގައި ތަކަންދޫ ރައްޔިތުން އުފުލަންޖެހޭ ތަކުލީފުތައް ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، ފެރީގެ ނިޒާމުގައި ތަކަންދޫއަށް ކައިރި ކުރާނަމަ ލިބޭނެ ފަސޭހަތަށް ރައްޔިތުންގެ ފަރާތުން އަޑުއިވިފައިވާ ކަމަށެވެ.

Advertisement

މިއާއިއެކު ރައީސް ޑރ.މުޢިއްޒު ވަނީ ރޯދަ މަހުގެ ކުރިން އާރުޓީއެލް ފެރީ ތަކަންދޫ އަށާއި މާރެންދޫއަށް މަޑު ކުރާގޮތަށް ހަމަޖެހިގެންދާނެކަމަށާއި، މިކަމުގެ ސަބަބުން ރައްޔިތުންނަށް ވަރަށް ބޮޑަށް ފަސޭހަވެގެންދާނެކަމަށެވެ.

މީގެ އިތުރުންވެސް ރައީސް ޑރ.މުޢިއްޒު ވަނީ ތަކަންދޫގެ ބަނދަރާއި، ސްކޫލް އަދި ސިއްހީ މަރުކަޒު އިތުރަށް ކުރިއެރުވުމަށް މަސައްކަތް ކުރައްވާނެ ކަމުގެ ޔަގީންކަންވެސް ދެއްވާފައެވެ.