އިދިކޮޅު އެންމެބޮޑު ޕާޓީ އެމްޑީޕީން ސަރުކާރާ ދެކޮޅަށް ޝުއޫރު ފާޅުކުރުމުގެ ގޮތުން ބޭއްވި ހިނގާލުން ސުލްހަވެރިކަމާއެކު ނިންމާލައިފިއެވެ.

"ފުދިއްޖެ، ފުނޑިއްޖެ" ނަމުގައި މި ހިނގާލުން ކުރިއަށްގެންގޮސްފައިވަނީ 20:30 ހުން ފެށިގެން ގާތްގަނޑަކަށް 3 ގަޑިއިރެއްހާ އިރަށެވެ. ހިނގާލުން ފަށާފައިވަނީ ހެންވޭރު އާޓިފިޝަން ބީޗްކައިރިންނެވެ. މާލެ ވަށައިގެން އެމްޑީޕީގެ ގިނަ އަދަދެއްގެ ސަޕޯޓަރުންނާއެކު ކުރިއަށްގެންދިޔަ މި ހިނގާލުމުގައި އެޕާޓީގެ ލީޑަރޝިޕުން ވަނީ ސަރުކާރުގެ ސިޔާސަތްތަކާ ގުޅޭގޮތުން ޝުއޫރުތައް ފާޅުކޮށްފައެވެ.

މި ހިނގާލުމުގައި ވާހަކަދައްކަވަމުން އެމްޑީޕީގެ ރައީސް ޢަބްދުﷲ ޝާހިދު ވިދާޅުވީ ސަރުކާރުން ރައްޔިތުންނަށް އެތަކެއް ވައުދުތަކެއް ވެގެން ވެރިކަމަށް އައިނަމަވެސް ވައުދުތައް ފުއްދަމުން ގެންގޮސްފައި ނުވާކަމަށާއި، ކުރެވުނުހާވެސް ކަމަކީ ރައްޔިތުންނަށް އަނިޔާވެރިވުން ކަމަށެވެ. ޝާހިދު ވިދާޅުވީ ސަރުކާރުން ރައްޔިތުން ބިކަކޮށްލައިފި ކަމަށާއި، މިއީ ރައްޔިތުންނަށް ހެޔޮއެދޭނެ ސަރުކާރެއް ނޫންކަމަށެވެ.

އެމްޑީޕީގެ ރައީސް ޢަބްދުﷲ ޝާހިދު ވާހަކަދައްކަވަނީ..

އެމްޑީޕީގެ ޗެއާޕާސަން ފައްޔާޒް ފައިސަލް ވިދާޅުވީ، ސަރުކާރުން ވެރިކަމަށް އައިސް ކަންކަން ކުރަމުން ގެންދަނީ އެއްވެސް އުސޫލެއްނެތި ހުދުމުހުތާރުކޮށްކަމަށެވެ. ސަރުކާރުން ޤާނޫނު އަސާސީ އިސްލާހުކުރި މައްސަލާގައި ފައްޔާޒް ވިދާޅުވީ ޤާނޫނު އަސާސީ ހިމާޔަތްކުރުމުގެ މިނިވަންކަން މިވަގުތު އޮތް ދައުލަތުގެ ހަމައެކަނި މުއައްސަސާއަކީ ސްޕްރީމްކޯޓުކަމަށް ވިދާޅުވެފައެވެ. ފައްޔާޒް ވަނީ ޤާނޫނު އަސާސީ ހިމާޔަތްކުރުމަށް ފަސްނުޖެހުމަށް ސްޕްރީމް ކޯޓުގެ ފަނޑިޔާރުންނަށް ގޮވާލާފައެވެ.

އެމްޑީޕީން މިރޭ ބޭއްވި ހިނގާލުމުގެ ތެރެއިން..

އެމްޑީޕީން ވަނީ ސަރުކާރުގެ ފަރާތުން ޤާނޫނު އަސާސީއަށް ހުށަހެޅި ބައެއް ކަންކަމަާ ދެކޮޅަށް ސްޕްރީމް ކޯޓަށް މައްސަލައެއް ވައްދާފައެވެ. 

އެމްޑީޕީން މިރޭ ކުރިއަށްގެންދިޔަ "ފުދިއްޖެ، ފުނޑިއްޖެ" ހިނގާލުމުގައި އެޕާޓީގެ ލީޑަރޝިޕްގެ ގިނަ އަދަދެއްގެ ބޭފުޅުން ވާހަކަދައްކާފައިވާއިރު، ޖުމްލަގޮތެއްގައި ހުރިހާ ބޭފުޅުންވެސް ވަނީ ސަރުކާރުގެ ސިޔާސަތުތަކަށް ވަރަށްބޮޑަށް ފާޑުވިދާޅުވެފައެވެ. މިރޭގެ ބޮޑު ހިނގާލުން ނިންމާލާފައިވަނީ އެއްވެސް ހަމަނުޖެހުމެއް ނުހިނގައި ވަރަށް އަމާން އޮމާންކޮށެވެ.