ޣައްޒާގައި އިސްރާއީލުން ހިންގަމުންދާ ގަތުލުއާއްމު ހުއްޓާލުމުގެ އެއްބަސްވުމާ ގުޅޭގޮތުން ބޭއްވި ބައްދަލުވުމަށް ރާއްޖެއިން މަރުހަބާ ކިޔައިފިއެވެ.
ޚާރިޖީ ވުޒާރާއިން ނެރުނު ބަޔާނެއްގައި ބުނީ، ހޮނިހިރު ދުވަހު މިޞުރުގެ ވެރިރަށް ޤާހިރާގައި ބޭއްވި "ޢަރަބް ސިކްސް-ޕާޓީ" މަޝްވަރާ ބައްދަލުވުމުގެ ނިންމުންތަކަށް ދިވެހިރާއްޖޭން މަރުހަބާ ކިޔާކަމަށާއި، އިސްރާއީލުން ޣައްޒާގައި ހިންގަމުންދިޔަ އުދުވާން ހުއްޓާލުމުގެ އެއްބަސްވުން ދެމެހެއްޓުމަށް ކުރާ މަސައްކަތްތަކަށް ރާއްޖެއިން ތާއީދުކުރާކަމަށެވެ.
މި އެއެއްބަސްވުން ފުރިހަމައަށް ތަންފީޒުކުރުމަށް ކަމާއިގުޅުންހުރި ފަރާތްތަކަށް އިލްތިމާސްކޮށް، ޚާރިޖީ ވުޒާރާގެ ބަޔާނުގައި ބުނީ، ޣައްޒާގެ ހާލުގައި ޖެހިފައިވާ ހުރިހާ ސަރަޙައްދަކަށް ލަސްނުކޮށް، އެއްވެސް ހުރަހަކާނުލައި އިންސާނީ އެހީތެރިކަން ފޯރުކޮށްދިނުމަކީ މުހިންމު ކަމެއް ކަމަށެވެ.
މިއާއިއެކު ޚާރިޖީ ވުޒާރާއިން ވަނީ ޣައްޒާ އަލުން އާރާސްތުކުރުމާބެހޭގޮތުން މަޝްވަރާކުރުމަށް ބައްދަލުވުމެއް ބޭއްވުމަށް ހުށަހަޅާފައިވާ ހުށަހެޅުމަށް މަރުހަބާ ކިޔާފައެވެ.
ފަލަސްޠީނުގައި ހިނގަމުންދާ ހަމަނުޖެހުމަށް ދެމެހެއްޓެނިވި ޙައްލެއް ލިބޭނީ 1967ގެ ކުރިން ކަނޑައެޅިފައި އޮތް އިންތަކުގެ މައްޗަށް ބިނާކޮށް، އިރުމަތީ ޤުދުސްއަކީ ވެރިރަށުގެ ގޮތުގައި ކަނޑައަޅައި މިނިވަން އަދި މުސްތަޤިއްލު ފަލަސްޠީނުގެ ދައުލަތެއް ޤާއިމުކުރެވިގެންކަމަށް ޚާރިޖީ ވުޒާރާގެ ބަޔާނުގައި ވެއެވެ.
Advertisement
This content is created and paid for by advertisers and does not involve Voice Journalists
