ދިވެހިރާއްޖޭގައި މަރުވާ މީހުންގެ 17 އިންސައްތަ މީހުން މަރުވަނީ ކެންސަރު ބަލީގައިކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭއިން) ބުނެފިއެވެ.

ދުނިޔޭގެ ސިއްހަތު ޖަމިއްޔާއިން ރާއްޖެއާ ބެހޭގޮތުން 2020 ވަނަ އަހަރުގެ ތަފާސްހިސާބުތަކުގެ މައްޗަށް އަންދާޒާކޮށްފައިވާ ގޮތުގައި ދިވެހިރާއްޖޭގައި އަހަރަކު މަރުވާ މީހުންގެ 17 އިންސައްތަ މީހުން މަރުވަނީ ކެންސަރު ބަލީގައެވެ. މާލެ ސަރަހައްދުގެ ހޮސްޕިޓަލްތަކުން 2019 ވަނަ އހަަރުން ފެށިގެން ލިބިފައިވާ މައުލޫމާތުގެ މައްޗަށް ބަލާއިރު، ރާއްޖޭގައި ކެންސަރުގެ ބާވަތްތަކުގެ ތެރޭގައި އުރަމަތީގެ ނުވަތަ ބްރެސްޓް ކެންސަރާއި، ފުއްޕާމޭގެ ކެންސަރު، ލޭގެ ކެންސަރު، ތައިރޮއިޑް، ލިވަރ އަދި ޕްރޮސްޓޭޓް ކެންސަރު އިތުރުކަން އެޗްޕީއޭއިން ވަނީ ފާހަގަކޮށްފައެވެ.

ކެންސަރަކީ ރާއްޖޭގައި މިހާރު ވަރަށް އާއްމު ބައްޔެކެވެ. ކެންސަރުގެވަރަށްގިނަ ވައްތަރުތައް ހުރެއެވެ. މި ބައްޔަކީ ހަށިގަނޑުގެ އެކި ތަންތަނުގައި އުފެދިދާނެ ބައްޔެކެވެ. އަދި ކެންސަރު ޓިއުމަރުތައް އުފެދިފައިވާ ސަރަހައްދުގެ ޓިޝޫތަކާއި ސެލްތައް އެހެން ހިސާބުތަކަށްވެސް ފެތުރެއެވެ.

- ދުންފަތުގެ އިސްތިއުމާލުކުރުމާއި ދުމަށް ހުށަހެޅުން

- ކެއިންބުއިމަުގެ ނުރަނގަޅު އާދަތައް

- ދުފުން

- އެކަށީގެންވާ މިންވަރަށް ހެލިފެލިވެ ކަސްރަތުކޮށް ނޫޅުން

- ބަރުދަން ހުންނަންވާ ވަރަށްވުރެ އިތުރުވުން

- ބަނގުރާ ބުއިން

- އަލްޓްރާވައިލެޓް ރޭޑިއޭޝަނަށް ހުށަހެޅުން

ހިނގަމުން މިދާ އަހަރުގެ ދުނިޔޭގެ ކެންސަރު ދުވަހަށް ކަނޑައަޅާފައިވަނީ "ޔުނައިޓެޑް ބައި ޔުނީކް" މި ޝިއާރެވެ. އެޗްޕީއޭއިން ވަނީ ކެންސަރު ބަލީގެ ނުރައްކަލުން ރައްކާތެރިވުމަށް ކުރެވިދާނެ ކަންކަން ބަޔާންކޮށްދީފައެވެ.

- ހެޕަޓައިޓިސް ބީއާއި ހިއުމަން ޕެޕިލޯމާ ވައިރަސް (އެޗްޕީވީ) ވެކްސިން ޖެހުން

- ދުންފަތުގެ އިސްތިއުމާލުނުކުރުމާއި ދުމުން ރައްކާތެރިވުން

- ދިފުމުން ދުރުހެލިވުން

- އަލްޓްރާވައިލެޓް ރޭޑިއޭޝަނުން ރައްކާތެރިވުން

- ދަރިފުޅަށް ގާތުން ކިރުދިނުން

- ރައްކާތެރިގޮތުގައި ޖިންސީގުޅުން ހިންގުން

- ކެއުމުގައި މޭވާ އާއި ތަރުކާރީ ވީހާވެސް ގިނައިން ބޭނުންކުރުން

- ޤަވައިދުން ކަސްރަތުކުރުން

- ޤަވާއިދުން ކެންސަރަށް ސްކްރީންކުރުން

މިއަހަރުގެ ކެންސަރުބަލީގެ ދުވަހާއި ގުޅިގެން ހެލްތް މިނިސްޓަރު ޢަބްދުﷲ ނާޡިމް އިބްރާހީމް ވިދާޅުވެފައިވަނީ ޕްރައިމަރީ ހެލްތު ކެއަރ ނިޒާމުގެ ތެރެއިން ކެންސަރަށް ސްކްރީންކުރަން ހާއްސަ އިސްކަމެއް ސަރުކާރުން ދެއްވާނޭކަމަށެވެ.