ފުލުހުންގެ ބެލުމުގެ ދަށުގައި ހުއްޓާ މީހަކަށް ސްޓްރޯކް ޖެހުނު ކަމަށް ބުނާ މައްސަލައެއް ބަަލަން ފަށައިފިއެވެ. 

ފުލުހުން މިއަދު މީޑިއާތަކަށް ފޮނުވި މެސެޖެއްގައި ވަނީ މަސްތުގެ ހާލަތުގައި ހުރި މީހަކު އުޅަނދެއް ދުއްވާކަމުގެ މައުލޫމާތު ފެބްރުވަރީ 8 ވަނަ ދުވަހުގެ 10:13 އެހާކަށްހާއިރު ފުލުހުންނަށް ލިބިފައިވާ ކަމަށެވެ. 

މި މައުލޫމާތަށް ބަލާފައި ފުލުހުން އެމައްސަލަ ބެލިއިރު އެމީހާ ދުއްވި ވޭން ހުޅުމާލެ ފިތުރޯނު މަގު އަރިމައްޗަށް އަަރައި އެކްސިޑެންޓްވެފައި އޮތްކަން ފާހަގަ ކުރެވިފައިވާ ކަމަށް އެ މުއައްސަސާއިން ބުންޏެވެ. މި މައްސަލައާއި ގުޅިގެން އިތުރަށް މައުލޫމާތު ސާފުކުރުމުން މި އުޅަނދު ހުޅުމާލެ ފޭސް2 އިން އަންނަނިކޮށް ފޭސް 1 އަށް ގުޅުވައިދޭ ބްރިޖް ޑިވައިޑާގައި ޖެހިވެސް އެކްސިޑެންޓްވެފައިވާކަން އެނގިފައިވާ ކަމަށް ފުލުހުން ހާމަކުރިއެވެ. 

Advertisement

މި މައްސަލައާއި ގުޅިގެން ފުލުހުންގެ ބެލުމުގެ ދަށަށް ގެނެސް ކުޑަކަމުދާ ތަކެތި ތަހުލީލު ކުރުމަށްފަހު ނެގަޓިވްވުމުން އޭނާ ދޫކޮށްލާފައިވާ ކަމަށް ފުލުހުން ބުންޏެވެ. ފުލުހުން ބުނީ އެމީހާ ފުލުހުންގެ ބެލުމުގެ ދަށަށް ގެނައުމަށްފަހު އަމަލުކޮށްފައިވާ ގޮތް ރިވިއުކުރުމުގެ މަސައްކަތް  ކުރަމުންދާ ކަމަށެވެ. އަދި އުސޫލުތަކާއި ހިލާފަށް އެއްވެސް ކަމެއް ހިނގާފައިވާނަމަ ނުވަތަ އިހުމާލެއްވެފައިވާނަމަ އަޅަންޖެހޭ ފިޔަވަޅު އަޅާނެ ކަމަށްވެސް ފުލުހުން ބުންޏެވެ. 

ސޯޝަލް މީޑިއާގައި ދައުރުވާ ޕޯސްޓުތަކުގައިވާ ގޮތުގައި އެމީހާ ފުލުހުންގެ ބެލުމުގެ ދަށުގައި 6 ގަޑިއިރު ވަންދެން ބަހައްޓާފައި ވެއެވެ. އެވަގުތުކޮޅު އޭނާ ބަލިވުމުން ފަރުވާއަށް ގެންގޮސްފައިނުވާ ކަމަށް އެ ޕޯސްޓުތަކުގައި ތުހުމަތުކޮށްފައި ވެއެވެ.