ތިމާވެށީގެ މައްސަލަތަކުގައި ޖޫރިމަނާ ކުރާ ކުންފުނިތަކުން ދައްކަންޖެހޭ ފައިސާ ނުދައްކާ މައްސަލާގައި އެފަރާތްތަކުގެ ވިޔަފާރިތައް ހުއްޓުވުމަށް ސަރުކާރުގެ ކަމާބެހޭ ފަރާތްތަކާއެކު ވާހަކަތައް ފެށުމަށް ރައްޔިތުން މަޖިލީހުގެ އެންވަޔަރަންމަންޓް އެންޑް ކްލައިމެޓް ޗޭންޖު ކޮމިޓީން ނިންމައިފިއެވެ.

ރައްޔިތުންގެ މަޖިލީހުގެ ތިމާވެއްޓާބެހޭ ކޮމިޓީގައި މިއަދު ވަނީ ތިމާވެށީގެ މައްސަލަތަކުގައި އީޕީއޭއިން ޖޫރިމަނާކުރުމުން އެކަމަށް ތަބާނުވެ ދައްކަންޖެހޭ ފައިސާ ނުދައްކާ ފަރާތްތަކުގެ މައްސަލަތައް ބެލުމަށް ނިންމައި، އެފަރާތްތަކުގެ ވިޔަފާރިތައް ހުއްޓުމަށް ސަރުކާރުގެ ކަމާބެހޭ އިދާރާތަކާއެކު މަޝްވަރާތައް ކުރިއަށްގެންދިއުމަށް ފާސްކޮށްފައެވެ. މިއަދުގެ ބައްދަލުވުމުގައި މައްސަލަ ހުށަހެޅުއްވި މާފަންނު ހުޅަނގު ދާއިރާގެ މެމްބަރު މުހައްމަދު މުސްތަފާ އިބްރާހީމް ވަނީ ތިމާވެށީގެ މައްސަލަތަކުގައި ޖޫރިމަނާކުރާ ކުންފުނިތަކުން ޖޫރިމަނާ ފައިސާ ނުދައްކަތީ އެކަމާ ގުޅޭގޮތުން ގިނަ ކަންތައްތަކެއް ފާހަގަކުރައްވާފައެވެ.

މިގޮތުން އެފަދަ ކުންފުނިތައް ޖޫރިމަނާކުރުމުންވެސް ފައިސާ ނުދައްކައި ހިތުހުރިގޮތަކަށް ކަންކަން ކުރަމުންދަނީ މިކަމުގައި އީޕީއޭ އަދި ޓްރާންސްޕޯޓް މިނިސްޓްރީން އަދާކުރަންޖެހޭ ޒިއްމާތައް އަދާނުކުރާތީކަމަށް އޭނާ ފާހަގަކުރެއްވިއެވެ. މުސްތަފާ ވިދާޅުވީ ތިމާވެށީގެ މައްސަލަތަކުގައި މިހާތަނަށް ޖޫރިމަނާކޮށްފައިވާ ކުންފުނިތަކުގެ ތެރެއިން ބައެއް ކުންފުނިތަކަކީ މިހާރުވެސް ރާއްޖޭގައި ފުޅާދާއިރާއެއްގައި ވިޔަފާރިތައް ކުރަމުން އަންނަ ކުންފުނިތައްކަން ފާހަގަކުރައްވާފައެވެ. 

ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީގެ މިއަދުގެ ބައްދަލުވުމުގެ ތެރެއިން.. ފޮޓޯ: މަޖިލިސް

މީގެ ތެރެއިން އިންޑިއާގެ އިންފްރާސްޓްރަކްޗާ ކުންފުނި، މޯހަން މުތާގެ މައްސަލަ މިސާލަކަށް ނަންގަވައި މުސްތަފާ ވިދާޅުވީ އެކުންފުނި ޖޫރިމަނާ ނުދެއްކުމުން ސަރުކާރުގެ ކަމާބެހޭ އިދާރާތަކަށް މިހާތަނަށް ކުރެވުނު ހަމަ އެއްވެސް ކަމެއް ނެތްކަމަށާއި، އެންމެ ކުޑަމިނުން ޗިޓް ރައްދުކުރަންދާނޭ އޮފީސް ހުންނަތަންވެސް ކަމާބެހޭ އިދާރާއަށް ނޭނގޭކަމަށެވެ. ނަމަވެސް އެކުންފުންޏަކީ ރާއްޖެއަށް ބޭނުންވާ ކާޑުގެ ބާވަތްތައް ގެނައުމުގެ އިތުރުންވެސް ގިނަ ޕްރޮޖެކްޓްތަކެއް ހިންގަމުން އަންނަ ކުންފުންޏެއްކަން އޭނާ ފާހަގަކުރެއްވިއެވެ.

މިއަދުގެ ކޮމިޓީ ބައްދަލުވުމުގައި ވަނީ ޖޫރިމަނާ ފައިސާ ނުދައްކާ މައްސަލާގައި ޓްރާންސްޕޯޓްގެ ވެރިން މަޖިލީހަށް ހާޒިރުކުރުމާއި، ވިޔަފާރިތައް ހުއްޓުވުމަށް ތިމާވެއްޓާބެހޭ ވުޒާރާއިން އިކޮނޮމިކް މިނިސްޓްރީއާ އެއްވެސް ކަހަލަ މުއާމަލާތެއް ކުރިތޯ ބެލުމަށް ނިންމާފައެވެ. 

ތިމާވެށީގެ މައްސަލަތަކުގައި ކުރާ ޖޫރިމަނާތައް ނުލިބޭ މައްސަލަ މިއަދުގެ ބައްދަލުވުމުގައި ވަރަށްބޮޑަށް ވަނީ ފާހަގަކޮށްފައެވެ. އީޕީއޭއިން މީގެކުރިން ހާމަކޮށްފައިވާ ތަފާސްހިސާބުތަކަށް ބަލާއިރު، ބޯޓުތައް ފަރަށްއެރުން ފަދަ މައްސަލަތަކުގައި މިހާތަނަށް ކުރި ޖޫރިމަނާތަކުން ދައުލަތަށް ލިބެންޖެހޭ ގިނަ އަދަދެއްގެ ފައިސާ ނުލިބެއެވެ. މިގޮތުން ތިމާވެށީގެ މައްސަލަތަކުގައި ޖޫރިމަނާގެ ގޮތުގައި ދައުލަތަށް ނުލިބި ބިލިއަނެއްހާ ރުފިޔާ ހުރިކަމަށް މިދިޔަ އަހަރު އީޕީއޭއިން ވަނީ ބުނެފައެވެ.