ކެނެޑާއާއި ފިލިޕީންސްގެ މެދުގައި ގާއިމްކުރާ އަސްކަރީ އެއްބަސްވުމުގެ މަސައްކަތް ވަރަށް އަވަހަށް ނިމި، ދެގައުމުގެ ސިފައިން ގުޅިގެން ދެކުނު ޗައިނާ ކަނޑުގައި އަސްކަރީ ތަމްރީނުތައް ބާއްވާނެކަމަށް ކެނެޑާއިން ބުނެފިއެވެ.

ކެނެޑާއިން ފިލިޕީންސްއަށް ކަނޑައަޅާފައި ހުންނަވާ ސަފީރު ޑޭވިޑް ހާޓްމަން ވިދާޅުވީ މި އެއްބަސްވުން މިހާރު ނިމުމަކާ ހިސާބަށް އައިސްފައިވާކަމަށެވެ. ކެނެޑާއަކީ ދެކުނު ޗައިނާ ކަނޑައަށް އަތްގަދަކުރުމަށް ޗައިނާއިން ގެންގުޅޭ ސިޔާސަތާ ދެކޮޅު ހަދާ ގައުމެކެވެ. އަދި އެގައުމުން ދަނީ ފިލިޕީންސްފަދަ އެކުވެރި ގައުމުތަކާއެކު ޕެސިފިކް ސަރަހައްދުގައި ކެނެޑާގެ ހަރަކާތްތައްވެސް އިތުރުކުރަމުންނެވެ.

މި އެއްބަސްވުމަކީ، ދެކުނު ޗައިނާ ކަނޑުގެ މައްސަލައިގައި ފިލިޕީންސްއާއި ޗައިނާގެ ގުޅުން ވަރަށް ބޮޑަށް ގޯސްވެފައިވާ މި ދަނޑިވަޅުގައި، ފިލިޕީންސްއާއި ރަހުމަތްތެރި ގައުމުތަކާއެކު އަސްކަރީ ގުޅުން އިތުރަށް ބަދަހިކުރުމަށް ފިލިޕީންސްގެ ރައީސް ފާޑިނަންޑް މާކޯސް ޖޫނިއަރ ގެންގުޅުއްވާ ސިޔާސަތުގެ ތެރެއިންވެސް ބައެކެވެ. މި ހަފްތާގައި ކެނެޑާއާއެކު މުހިއްމު އަސްކަރީ ތަމްރީނުތަކެއް ބޭއްވުމަށް ކެނެޑާގެ ކަނޑުގެ ސިފައިންގެ މަނަވަރެއްކަމަށްވާ އެޗް.އެމް.ސީ.އެސް އޮޓާވާ ވަނީ މެނީލާއަށް ގޮސްފައެވެ.

Advertisement

ފިލިޕީންސްއިން ވަނީ އެމެރިކާ، ޖަޕާން، ފަރާންސް އަދި އޮސްޓްރޭލިއާ އާއެކުވެސް މިދިޔަ އަހަރެއްހާ ދުވަހުގެ ތެރޭގައި އަސްކަރީ ތަމްރީނުތައް ބާއްވާފައެވެ. މީގެ ތެރެއިން ބައެއް ތަމްރީނުތައް ބޭއްވީ ދެކުނު ޗައިނާ ކަނޑުގެ ތެރޭގައެވެ. އެމައްސަލައިގައި ޗައިނާއިން އޮތީ ވަރަށް ބޮޑަށް ހިތްހަމަނުޖެހިފައެވެ.

ކެނެޑާއާއެކު ހަދާ އަސްކަރީ އެއްބަސްވުން ފައިނަލްވުމާ ގާތުގައިވާއިރު، ފިލިޕީންސްއިން ގެންދަނީ ނިއުޒިލޭންޑް އަދި ފްރާންސާއެކުވެސް މިފަދަ އެއްބަސްވުމެއް އެކުލަވާލުމުގެ މަސައްކަތްކުރަމުންނެވެ.