ހަމާސްގެ ދަށުގައިވާ ގައިދީން ހޮނިހިރު ދުވަހުގެ ކުރީން މިނިވަން ނުކޮށްފި ނަމަ، އަލުން ޤަތުލު ޢާއްމު ފެށުމަށް އިސްރާއިލު ސިފައިން މިހާރުވެސް ތިބީ ތައްޔާރަށް ކަމަށް ބުނެފިއެވެ.
2023 ވަނަ އަހަރުގެ އޮކްޓޯބަރ މަހުން ފެށިގެން ކުރިއަށް ދިޔަ ޤަތުލް އާއްމު ޖެނުއަރީ 19 ގައި މެދުކަނޑާލާފައިވާއިރު، އެއްބަސްވުމުގެ ދަށުން ހޮނިހިރު ދުވަހު އިސްރާއީލުގެ އިތުރު ތިން ގައިދީން ދޫކުރުމަށް ހަމާސްއިން ވަނީ އެއްބަސްވެފައެވެ. ނަމަވެސް، އިސްރާއީލުން އެއްބަސްވުމާ ހިލާފުވެފައިވާ ކަމަށް ބުނެ މި ހަފްތާގައި ރަހީނުން ދޫނުކުރާނެ ކަމަށް ހަމާސް އިން ވަނީ ފަހުން ބުނެފައެވެ.
އެކަމާއި ގުޅިގެން އިސްރާއީލުގެ ދިފާއީ ވަޒީރު އިސްރާއީލް ކަޓްޒް ބުނި ގޮތުގައި އެއްބަސްވުމުގެ މަގްސަދަކީ ޣައްޒާގައި ތިބި ރަހީނުން އަވަހަށް ދޫކުރުމެވެ. "ހަމާސްއިން ރަހީނުން ދޫކުރުން ހުއްޓާލައިފިނަމަ އެއްބަސްވުމެއް ނޯންނާނެ، އަދި ހަނގުރާމަ ފެށޭނެ،" އޭނާ ތެލްއަވީވްގައި ހުންނަ ދިފާއީ މައި މަރުކަޒުގައި ވާހަކަދައްކަމުން ބުންޏެވެ.
އަދި "އަލުން ފަށާ ހަނގުރާމަ" އަކީ މުޅިން ތަފާތު ގޮތަކަށް ކުރިއަށްދާނެ ހަނގުރާމައެއް ކަމަށާއި، އޭގެ ސަބަބުން ޓްރަމްޕްގެ ވިޝަން ޣައްޒާގައި ތަންފީޒުކުރެވޭނެ ކަމަށްވެސް ކަޓްޒް ބުންޏެވެ.
މި ހަފްތާގެ ހޮނިހިރު ދުވަހުގެ ސުންގަޑިއަށް އިތުރު އިސްރާއީލީ ގައިދީން ދޫކޮށްނުލައިފިނަމަ، ޣައްޒާ "ނަރަކައަކަށް" ހަދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
