ހިލޭ ޑިގްރީ ސްކީމްއަކީ ކުރީގެ ރައީސް މުޙައްމަދު ނަޝީދުގެ ވައުދުތަކުގެ ތެރޭގައި ހިމެނޭ ވައުދެއް ކަމަށް ރައްޔިތުންގެ މަޖިލީހުގެ ކުރީގެ އުނގޫފާރު ދާއިރާގެ މެންބަރު މުޙައްމަދު ވަހީދު (ވައްޑެ) ވިދާޅުވެއްޖެއެެވެ.

ވައްޑެ މިގޮތަށް ވިދާޅުވީ އެކްސްގައި ކުރީގެ ރައީސް އިބްރާހީމް މުޙައްމަދު ޞާލިޙު ކުރެއްވި ޓްވީޓެއްގެ ރައްދުގައެވެ. 

މިކަމާއި ގުޅިގެން ވައްޑެ އެކްސްގައި ކުރެއްވި ޕޯސްޓެއްގައި ވަނީ ރައީސް ނަޝީދު 2018 ވަނަ އަހަރު އެމްޑީޕީގެ މެނިފެސްޓޯ އެކުލެވުމުގައި ހިލޭ ޑިގްރީ ޕްރޮގްރާމްވެސް މެނިފެސްޓޯގައި ޝާމިލުކުރަން އެދިވަޑައިގެންނެވިކަމަށް ވިދާޅުވެފައެވެ.

Advertisement

ރައީސް ޞާލިޙު ކުރެއްވި ޕޯސްޓެއްގައި ވިދާޅުވީ ހިލޭ ޑިގްރީ ޕްރޮގްރާމަކީ އެމަނިކުފާނުގެ ވެރިކަމުގައި ކުރެވުނު އެންމެ ފަޚުރުވެރިވާ އެއް ކަންތަކެވެ. ރައީސް ޞާލިޙު އިއްޔެ މިފަދައިން ވިދާޅުވީ އިއްޔެކީ އެ ޕްރޮގްރާމް ފެށުނުތާ 6 އަހަރު ފުރޭ ދުވަސް ކަން ފާހަގަކުރެއްވުމުގެ ގޮތުންނެވެ. 

ރައީސް ޞާލިހް ވިދާޅުވީ، އެ ޕްރޮގްރާމްގެ ސަބަބުން ހިލޭ ތަޢުލީމް ހާސިލް ކުރުމުގެ ފުރުސަތު ހުޅުވިގެންދިޔަ ކަމަށެވެ. 

ހިލޭ ޑިގްރީ ޕްރޮގްރާމަކީ ކުރީގެ ރައީސް ޞާލިހްގެ ވެރިކަމުގައި 2019 ވަނަ އަހަރު ފެށުނު ޕްރޮގްރާމެކެވެ. މި ޕްރޮގްރާމްގެ ދަށުން، ދިވެހިރާއްޖޭގެ ޤައުމީ ޔުނިވަރސިޓީއާއި، އިސްލާމީ ޔުނިވަރސިޓީއާއި، އަމިއްލަ ކޮލެޖުތަކުން ކިޔެވުމުގެ ފުރުސަތު ލިބެއެވެ.

ޤައުމީ ޔުނިވަރސިޓީއާއި އިސްލާމީ ޔުނިވަރސިޓީގައި ކިޔަވާ ދަރިވަރުންނަށް މުޅި ކޯސް ހިލޭ ކޮށްފައިވާއިރު، އަމިއްލަ ކޮލެޖުތަކުން ޑީގްރީ ހަދާ ދަރިވަރުންގެ ކޯހުގެ ވަކި އިންސައްތައެއް ސަރުކާރުން ހަމަޖައްސާގޮތަށް ވަނީ މި ސްކީމްގައި ހިމަނާފައެވެ. އެގޮތުން އަމިއްލަ ކޮލެޖުތަކުން ކިޔަވާ ދަރިވަރުންނަށް ކޯސް ފީ ހިލޭކޮށްދެނީ %40 އާއި %60އާ ދެމެދުގެ އަދަދުންނެވެ.