އިންޑިއާގެ ވެރިރަށް ނިއު ދިއްލީގެ ރެއިލްވޭ ސްޓޭޝަނެއްގައި މީހުން ބައިބޯވެ ތޮއްޖެހުމުގެ ސަބަބުން 15 މީހުން މަރުވެއްޖެއެވެ. މި ހާދިސާ ހިނގީ ހިންދޫ ދީނުގެ އަހަރީ މަހާކުމްބް މެލާ ފެސްޓިވަލަށް ދިއުމަށް ގިނަ އަދަދެއްގެ މީހުން ޓްރެއިނަށް އަރަން މަސައްކަތް ކުރަމުންދަނިކޮށެވެ.

އެގޮތުން، ހޮނިހިރު ދުވަހުގެ ރޭ ގާތްގަނޑަކަށް 8:00 ގައި ނިއު ދިއްލީ ރެއިލްވޭ ސްޓޭޝަންގެ ދެ ޕްލެޓްފޯމެއްގައި ހިނގި މި ހާދިސާގައި މަރުވި މީހުންގެ ތެރޭގައި 10 އަންހެނުންނާއި 3 ކުޑަކުދިން ހިމެނެއެވެ.

ދިއްލީގެ ޗީފް މިނިސްޓަރ އަތިޝީ ވިދާޅުވި ގޮތުގައި މަރުވެފައިވަނީ 15 މީހުންނެވެ. ނަމަވެސް އެން.ޑީ.ޓީ.ވީ އިން ރިޕޯޓުކުރި ގޮތުގައި މަރުވެފައިވަނީ 18 މީހުންނެވެ.

އިންޑިއާގެ ރެއިލްވޭ މިނިސްޓަރ އަޝްވިނީ ވައިޝްނަވް ވިދާޅުވި ގޮތުގައި ކުއްލިއަކަށް ސްޓޭޝަނަށް އައި ގިނަ އަދަދެއްގެ މީހުން އެހެން ތަނަކަށް ގެންދިއުމަށް 4 ޓްރެއިން ބޭނުންކުރެވުނެވެ. އަދި މި ހާދިސާއާ ގުޅިގެން ތަޙުޤީޤެއް ފަށާފައިވާ ކަމަށް އެ މިނިސްޓަރު ވިދާޅުވިއެވެ.

ސޯޝަލް މީޑިއާގައި ޙިއްސާކުރެވުނު ވީޑިއޯ ފުޓޭޖްތަކުން ދައްކާ ގޮތުގައި މީހުން ވަނީ އެއްވެ ތޮއްޖެހި، ޓްރެއިނަށް އަރަން މަސައްކަތްކޮށްފައެވެ. މި ހާދިސާ ދުށް މީހަކު އިންޑިއާގެ އޭ.އެން.އައި ނިއުސް އޭޖެންސީއަށް ބުނި ގޮތުގައި ޓްރެއިނަށް މީހުން ޕްލެޓްފޯމުގައި ދުވެ އެކަކު އަނެކަކުގެ މައްޗަށް ވެއްޓި އަނިޔާތައް ވަނީ ވެފައެވެ. 

ޓައިމްސް އޮފް އިންޑިއާ އިން ބުނާ ގޮތުގައި މި ހާދިސާ ހިނގީ، ދެ ޓްރެއިން ލަސްވުމުގެ ސަބަބުން ޕްލެޓްފޯމްތަކުގައި ގިނަ އަދަދެއްގެ މީހުން އެއްވެފައި ތިބި ވަގުތެއްގައި އައި ޓްރެއިނަކަށް އަރަން އުޅުމުގެ ތެރޭގައެވެ.