އދ. ހަންޏާމީދޫގެ ނަން ނުބައިކޮށް ލިޔާތީ އެރަށުގެ ނަން ދިވެހި ބަހުންނާއި އިނގިރޭސި ބަހުން ލިޔަންވީގޮތް އެރަށު ކައުންސިލުން ބުނެދީ އިއުލާންކޮށްފިއެވެ.

ހަންޏާމީދޫގެ ކައުންސިލުން ނެރުނު އިއުލާނެއްގައި ބުނީ އެރަށުގެ ނަން ސަރުކާރުގެ ބައެއް އިދާރާތަކުންނާއި އަމިއްލަ ބައެއް ޖަމުއިއްޔާ ޖަމާއަތްތަކުންނާއި، އެކިއެކި ކުންފުނިތަކުން، ލިޔުމުގައި ތަފާތު ގޮތްގޮތަށް ލިޔެފައި ހުންނަކަން، އެ ކައުންސިލްތައް ލިބޭ ބައެއް ލިޔުންތަކުން އެނގޭކަމަށެވެ. 

އެހެންކަމުން ހަންޏާމީދޫގެ ނަން ދިވެހިބަހުންނާއި، އިގިރޭސިބަހުން ލިޔާނެ ރަގަޅުގޮތް އިއުލާނުގައި ވަނީ ބުނެދީފައެވެ. 

ހަންޏާމީދޫގެ ނަން ދިވެހި ބަހުން ލިޔާނެ ގޮތް: ހަންޏާމީދޫ 

އިނގިރޭސިބަހުން ނާއި ލެޓިން ބަހުން ލިޔާނެ ގޮތް:   HANGNAAMEEDHOO (Hangnaameedhoo)

ހަންޏާމީދޫގެ ކައުންސިލުން ބުނީ ރައީސުލްޖުމްހޫރިޔާގެ ޤަރާރު ނަންބަރު: 2/2025 "ދިވެހިރާއްޖޭގައި މީހުން ދިރިއުޅޭ ރައްތައް ކަނޑައެޅުން" ޤަރާރުގައި ވެސް އެ ރަށުގެ ނަން ލިޔެފައި އޮންނަނީ އިސްވެ ބުނެފައިވާ ގޮތަށް ކަމަށެވެ.