ޤަތަރުގެ އަމީރު ޝެއިޚް ތަމީމް ބިން ޙަމަދު އަލްޘާނީ އިންޑިއާއަށް ކުރައްވާ ފުރާމަނަ ދަތުރުފުޅެއްގައި އިއްޔެ އެގައުމަށް ވަޑައިގެންފިއެވެ.

ދެގައުމުގެ ދެމެދުގައި އޮންނަ ޚާއްސަ ގުޅުމުގެ ރަމްޒެއްގެ ގޮތުން ޝައިޚް ތަމީމްއަށް ދިއްލީ އެއަރޕޯޓުން މަރުޙަބާ ވިދާޅުވީ ސީދާ ބޮޑުވަޒީރު ނަރެންދްރަ މޯދީއެވެ. ދެގައުމުގެ ދެމެދުގައި ބާއްވާ ރަސްމީ ވާހަކަތަކާއި އިތުރު ޙަރަކާތްތައް މިއަދު ދިއްލީގައި އޮންނާނެއެވެ. މި މަޝްވަރާތަކުގައި ދެގައުމުގެ ގުޅުން އިތުރަށް ބަދަހިވެގެންދާނެކަމަށް އިންޑިއާގެ ޚާރިޖިއްޔާގެ ތަރުޖަމާނު ވިދާޅުވިއެވެ. މިއަދުގެ ރަސްމީ ވާހަކަތަކުގައި ދެގައުމުގެ ދެމެދުގައި ވިޔަފާރިއާއި އިންވެސްޓްމަންޓް އަދި ހަކަތަޔާއި ޓެކްނޮލޮޖީގެ ދާއިރާއިން ގުޅުން ބަދަހިކުރުމާ ބެހޭ ގޮތުން ދެ ލީޑަރުން މަޝްވަރާކުރައްވާނެކަމަށް އިންޑިއާގެ މީޑިއާތަކުން ލަފާކުރެއެވެ. ބޮޑުވަޒީރާއެކު އޮންނަ މަޝްވަރާތަކުގެ އިތުރު ޝެއިޚް ތަމީމް އިންޑިއާގެ ރައީސާ ޑްރޮޕުޑީ މަރްމޫ އާއިވެސް ބައްދަލުކުރައްވާނެއެވެ.

މިއީ ޝެއިޚް ތަމީމް އިންޑިއާއަށް ކުރައްވާ ދެވަނަ ފުރަމާނަ ދަތުރުފުޅެވެ. މީގެ ކުރިން 2015 ވަނަ އަހަރުވެސް އެމަނިކުފާނު ވަނީ ފުރާމަނަ ދަތުރުފުޅެއްގައި އިންޑިއާއަށް ވަޑައިގެންފައެވެ.

Advertisement