ޔުއެފާ ޗެންޕިއަންސް ލީގު ކުއާޓާ ފައިނަލުގެ ގުރުލުން ހުކުރު ދުވަހު ބޭއްވިއިރު، ސްޕެއިންގެ ބާސެލޯނާއި ޕޯޗުގަލްގެ ބެންފީކާ ވާދަކުރަން ޖެހިއްޖެއެވެ.

ޗެންޕިއަންސް ލީގު ލީގުބުރުގެ ދެވަނަ ޓީމުގެ ގޮތުގައި ބާސެލޯނާ ކުއާޓާ ފައިނަލުން ޖާގަހޯދިއިރު، ބެންފީކާ ކުއާޓާ ފައިނަލުން ޖާގަހޯދީ ޕްލޭއޮފްގައި 4-3 ގެ އެގްރީގޭޓް ނަތީޖާއަކުން މޮނާކޯ ބަލިކުރުމަށްފަހު އެވެ. އަދި މިދެޓީމު ލީގުބުގައި ކުޅުނު މެޗު 5-4 ގެ ނަތީޖާއަކުން ކާމިޔާބުކުރީ ބާސެލޯނާ އެވެ.

މީގެ އިތުރުން މިދެޓީމު އެންމެ ފަހުން ކުޅުނު ނުވަ މެޗުގެ ތެރެއިން ހަތަރު މެޗުން ބާސެލޯނާ މޮޅުވިއިރު، ހަތަރު މެޗު ވަނީ އެއްވަރުވެފައެވެ. އަދި އޭގެތެރެއިން ބެންފީކާ މޮޅުވެފައިވަނީ އެންމެ މެޗަކުންނެވެ. އަދި ބާސެލޯނާ އިން ޗެންޕިއަންސް ލީގު ފަސް ފަހަރަށް ކާމިޔާބުކުރިއިރު، ބެންފީކާ އިން ވާނީ ދެ ފަހަރަށް ޔޫރަޕްގެ ޗެންޕިއަންކަން ހޯދާފައެވެ. 

މީގެ އިތުރުން 1961 ވަނަ އަހަރުގެ ފައިނަލުގައި މިދެޓީމު ވާދަކުރި މެޗު ބެންފީކާ އިން ކާމިޔާބުކުރީ ވާދަވެރި ކުޅުމަކަށްފަހު 3-2 ގެ ނަތީޖާއަކުންނެވެ.

ކުއާޓާ ފައިނަލުގެ އިތުރު މެޗުތަކަށް ބަލާއި ޗެންޕިއަން ރެއާލް މެޑްރިޑް ކުޅެންޖެހުނީ ވާދަވެރި އެތްލެޓިކޯ މެޑްރިޑާއި ދެކޮޅަށެވެ. ރެއާލް މުބާރާތުގެ ކުއާޓާ ފައިނަލުން ޖާގަހޯދީ ޕްލޭއޮފްގައި 6-3 ގެ ނަތީޖާއަކުން ޕްރެމިއާ ލީގު ޗެންޕިއަން މެންޗެސްޓާ ސިޓީ ބަލިކޮށްފައެވެ.

މިއީ މެޑްރިޑް ޑާބީއެއް ޗެމްޕިއަންސް ލީގުގައި ވާދަކުރާ ހަ ވަނަ ފަހަރެވެ. އަދި އޭގެ ތެރޭގައި 2014 އަދި 2016 ވަނަ އަހަރުގެ ފައިނަލުގެ އިތުރުން 1959 އަދި 2017 ވަނަ އަހަރުގެ ސެމީފައިނަލާއި 2015 ވަނަ އަހަރުގެ ކުއާޓާ ފައިނަލް ކާމިޔާބުކުރީ ރެއާލް މެޑްރިޑުންނެވެ.

ޖަރުމަނުގެ ބަޔާން މިއުނިކް ވާދަކުރަން ޖެހުނީ ޖަރުމަނުގެ ޗެންޕިއަން ބަޔާން ލެވަކޫސަން އާއި ދެކޮޅަށެވެ. މިއީ މި ދެޓީމު، ޗެމްޕިއަންސް ލީގު ތާރީޚުގައި ވެސް ވާދަކުރަންޖެހުނު ފުރަތަމަ ފަހަރެވެ.

އިނގިރޭސި ޕްރިމިއާ ލީގުގެ އެއްވަނައިގަ އޮތް ލިވަޕޫލް ވާދަކުރަން ޖެހުނީ ފްރާންސްގެ ޕީއެސްޖީއާ ދެކޮޅަށެވެ. މިއީ 2018-2019 ސީޒަނުން ފަހުން، މި ދެ ޓީމު ވާދަކުރާ ފުރަތަމަ ފަހަރެވެ. އަދި މި ދެ ޓީމު އެެންމެ ފަހުން ކުޅުނު މެޗުން ލިވަޕޫލް މޮޅުވިއިރު އެފަހަރު ލިވަޕޫލުން ވަނީ މުބާރާތުގެ ޗެންޕިއަންކަން ހޯދާފައެވެ.

އާސެނަލްއާއި ނެދަލޭންޑްސްގެ ޕީއެސްވީ ބައްދަލުކުރާއިރު، އެސްޓޮން ވިލާ އާ ދެކޮޅަށް ނުކުންނަނީ ބެލްޖިއަމްއަށް ނިސްބަތްވާ ކްލަބް ބްރޫޖްއެވެ.

ހޯމް އެންޑް އަވޭ އުސޫލުން ކުޅޭ މި މެޗްތައް އޮންނާނީ މާރިޗު މަހުގެ 4-5 އަދި އެ މަހުގެ 11-12 ގައެވެ. އަދި މިއީ ޗެންޕިއަންސް ލީގު ފޯމެޓަށް ގެނެވުނު ބަދަލާއެކު 36 ޓީމައެކު މުބާރާތް ކުރިއަށް ގެންދާ ފުރަތަމަ ފަހަރެވެ.