ޒިންބާބުވޭއަށް ނިސްބަތްވާ މަޝްހޫރު ދީނީ އިލްމުވެރިޔާ އައްޝައިހް އަދުނާން މެންކު ރާއްޖެ ވަޑައިގަތުމަށް ހަމަޖެހިއްޖެ އެވެ.
ޝައިހް އަދުނާން މެންކަކީ މުޅި ދުނިޔޭގައި ވެސް މުސްލިމުންގެ މެދުގައި ވަރަށް މަގުބޫލު އިލްމުވެރި އެކެވެ. ހާއްސަކޮށް ޒުވާނުންގެ މެދުގައި ޝެއިހް ވަރަށް މަގުބޫލެވެ.
ރާއްޖޭގައި ދީނީ ހޭލުންތެރި ކަމަށް ވަރަށް ފުޅާ ދާއިރާއެއްގައި މަސައްކަތް ކުރާ އަލް އަސްރު ޖަމިއްޔާ އިން ބުނީ މި އަހަރު ރޯދައަށް ދީނީ އިލްމުވެރިޔާ އައްޝައިހް އަދުނާން މެންކު ރާއްޖެ ގެނައުމަށް ހަމަޖެހިފައިވާ ކަމަށެވެ. ޝެއިހް ރާއްޖެ ވަޑައިގަންނަވާނީ މިއަދު އެވެ. އަދި އަންނަ މަހުގެ 11 ވަނަ ދުވަހުގެ ނިޔަލަށް ރާއްޖޭގައި ހުންނަވާނެ އެވެ.
މި މުއްދަތުގައި ހުޅުމާލެ ރަޝީދު މިސްކިތުގައި ދީނީ ދަރުސްތައް ކުރިއަށް ގެންދަވާނެ އެވެ. ދަރުސްތައް އޮންނާނީ ކޮންމެ ދުވަހެއްގެ އަސްރު ނަމާދަށް ފަހު އެވެ. އަދި ޝެއިހް އަދުނާން ބައިވެރިވެވަޑައިގަންނަވާ ހާއްސަ ފޯރަމެއް ވެސް ބޭއްވުމަށް ވަނީ ހަމަޖެހިފަ އެވެ.
އަސްރުން ކުރިން ވަނީ ޒިންބާބުވޭއަށް ނިސްބަތްވާ މަޝްހޫރު ދީނީ އިލްމުވެރިޔާ އައްޝައިހް އިބްރާހިމް މެންކު ވެސް ރާއްޖެ ގެންނަވާފަ އެވެ.
އަސްރުން ގެންދަނީ ވަރަށް ގިނަ ދީނީ ހަރަކާތްތައް ބާއްވަމުންނެވެ. އެ ގޮތުން ސިލްސިލާ ގޮތެއްގައި ބޮޑެތި ދަރުސްތަކާއި ތަފާތު ވޯކްޝޮޕްތައް ބާއްވަމުން ގެންދެ އެވެ. "އަގީދާ" އަދި "އައްޑަނަ" ނަމުގައި ކުރިއަށް ގެންދާ ވޯކްޝޮޕްތައް ފާހަގަކޮށްލެވެ އެވެ.
މީގެ އިތުރުން އެ ޖަމިއްޔާ އިން ވަނީ އަސްރު ޕަބްލިކޭޝަންގެ ދަށުން ވަރަށް ގިނަ ފޮތްތައް ވެސް ނެރެފަ އެވެ.
Advertisement
This content is created and paid for by advertisers and does not involve Voice Journalists
