ޖަރުމަންވިލާތުގައި ދާދިފަހުން ބޭއްވި އިންތިޚާބަށްފަހުވެސް، އެޤައުމުން އިންޑިއާއާ މެދު ގެންގުޅޭ ސިޔާސަތަށާއި، ޖުމްލަކޮށް ޚާރިޖީ ސިޔާސަތަށް މާބޮޑު ބަދަލެއް ނާންނާނެކަމަށް ޖަރުމަންވިލާތުން އިންޑިއާއަށް ކަނޑައަޅާފައި ހުންނަވާ ސަފީރު ފިލިޕް އެކަރމަން ވިދާޅުވެއްޖެއެވެ.

އެކަރމަން ވިދާޅުވީ ޖަރުމަންވިލާތުގައި ކޮންމެ ވެރިއެއް ހުންނެވިނަމަވެސް އިންޑިއާއާމެދު އޮންނަ ގުޅުން ބަދަހިވާނެކަމަށެވެ. އެގޮތުން ކުރީގެ ޗާންސެލަރ އެންގެލަރ މާކެލްގެ ވެރިކަމުގައި އިންޑިއާގެ ބޮޑުވަޒީރު ނަރެންދްރަ މޯދީއާއެކު އެކަމަނާވެސް ގާތް ގުޅުމެއް ބޭއްވިކަން ސަފީރު ފާހަގަކުރެއްވިއެވެ. އިންޑިއާއަކީ މުހިއްމު ބައިވެރިއެއްކަމަށް ޖަރުމަންވިލާތުން އަދިވެސް ބަލަމުންދާނެކަމަށް ސަފީރު ވިދާޅުވިއެވެ.

ފެބްރުއަރީ މަހު ބޭއްވި އިންތިޚާބު ކާމިޔާބުކުރީ ކަނާތުފިޔައިގެ މެދުގައި ހިމެނޭ ކްރިސްޓިއަން ޑިމޮކްރެޓިކް ޕާޓީއާއި ކޮންޒަވޭޓިވް ޕާޓީގެ ކޯލިޝަންއެވެ. އެހެންކަމުން ދެން ޗާންސެލަރކަމަށް ވަޑައިގަންނަވާނެކަމަށް ބޮޑަށް ބެލެވެނީ އެޕާޓީގެ ލީޑަރު ފްރެޑްރިކް މާޒްއެވެ. އެހެންނަމަވެސް އޭނާއަށް ސަރުކާރެއް އެކުކަވާލެވެން އަންނަނީ ކޯލިޝަން ފުޅާކޮށްގެންނެވެ. އެކަމަށް މިމަހުގެ ނިޔަލަށް އޭނާއަށް ވައުގު އެބައޮތެވެ. މިހާރުވެސް ކްރިސްޓިއަން ޑިމޮކްރެޓްސް ގެންދަނީ ވެރިކަމުން ދުރަށްދާ އޯލަފް ޝޮލްޒްގެ ސޯޝަލް ޑިމޮކްރެޓިކް ޕާޓީއާއިވެސް މަޝްވަރާކުރަމުންނެވެ.

Advertisement

އައު ސަރުކާރު ވެރިކަމާ ހަވާލުވާނީ އެޕްރީލް މަހުގެ 20 ވަނަ ދުވަހުއެވެ.