ރާއްޖޭގެ ޤައުމީ އެއަރލައިން، މޯލްޑިވިއަންގެ ފުރަތަމަ ވައިޑް ބޮޑީ އެއަރކްރާފްޓް، އޭ 330 މަތިންދާބޯޓުން އިންޑިއާގެ ކޮޗިން އާއި ޓްރިވަންޑްރަމަށް ދަތުރުތައް ފަށައިފި އެވެ.

މީގެ ކުރިން މި ދެ ސިޓީއަށް މޯލްޑިވިއަންގެ ދަތުރުތައް ކުރަމުން އައީ އޭޓީއާރު 72 އަދި އެއަރބަސް އޭ 320 މަރުކާގެ ބޯޓުތަކުންނެވެ. ނަމަވެސް ޑިމާންޑް އިތުރުވުމާއެކު މޯލްޑިވިއަނުން އެ ދެ ސިޓީއަށް ދަތުރުތައް ވަނީ ފަށާފައެވެ. 

މި ވައިޑް-ބޮޑީ މަތިންދާ ބޯޓަކީ 264 މީހުންގެ ޖާގައިގެ އެއަރބަސް އޭ330ގެ 200 ވޭރިއަންޓްގެ މަތިންދާ ބޯޓެކެވެ. ޖުމްލަ 260 މީހުންގެ ޖާގައިގެ މި ބޯޓަކީ ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާސް ހިމެނޭ މަތިންދާބޯޓެކެވެ. އެއިން ޗައިނާގެ ތިން މަންޒިލަކަށް ދަތުރު ކުރެއެވެ. އެއީ ޗެންގްޑޫގެ އިތުރުން ބެއިޖިން އާއި ޝެންހާއި އަށެވެ.

އަދި އިތުރު އޭ 330 ބޯޓެއް ގަތުމަށް މޯލްޑިވިއަންއިން މަސައްކަތްކުރަމުންދާ ކަމަށާއި، މި އިތުރު ބޯޓާއެކު ޔޫރަޕްގެ ސިޓީތަކަށްވެސް ސީދާ ދަތުރުތައް ކުރުމަށް ރޭވިފައިވާ ކަމަށް އެއަރލައިންއިން މަޢުލޫމާތު ދީފައިވެއެވެ.