ރަޝިއަން ފެޑަރޭޝަން އަދި ކިންގްޑަމް އޮފް މޮރޮކޯއަށް ރާއްޖެއިން ކަނޑައަޅުއްވާ ނޮން-ރެޒިޑެންޓް ސަފީރުކަމަށް އައްޔަން ކުރުމަށް ދެ ބޭފުޅަކަށް ރައްޔިތުންގެ މަޖިލީހުން ރުހުން ދީފިއެވެ. 

ރަޝިއަން ފެޑަރޭޝަން އަދި ކިންގްޑަމް އޮފް މޮރޮކޯއަށް ރާއްޖެއިން ކަނޑައަޅުއްވާ ނޮން-ރެޒިޑެންޓް ސަފީރުކަމަށް އައްޔަނުކުރެއްވުމަށް ރައީސުލްޖުމްޙޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ވަނީ ނަން ހުށަހަޅުއްވާފައެވެ. 

އެގޮތުން، ރަޝިއަން ފެޑަރޭޝަނަށް ރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް އައްޔަނުކުރުމަށް ހުށަހަޅުއްވާފައިވަނީ ތުރުކީއަށް ރާއްޖެއިން ކަނޑައަޅުއްވާފައިވާ ސަފީރު، ޗީފް އޮފް ޑިފެންސް ފޯސްގެ މަގާމުގައި ކުރިން ހުންނެވި ލެފްޓިނެންޓް ޖެނެރަލް (ރިޓަޔާޑް) އަބްދުއްރަހީމް އަބްދުއްލަތީފްގެ ނަމެވެ.

ކިންގްޑަމް އޮފް މޮރޮކޯއަށް ރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް އައްޔަނުކުރުމަށް ހުށަހަޅުއްވާފައިވަނީ ސައުދީ އަރަބިއްޔާއަށް ރާއްޖެއިން ކަނޑައަޅުއްވާފައިވާ ސަފީރު އަހުމަދު ސަރީރުގެ ނަމެވެ.

މަޖިލީހުގެ މިއަދުގެ ޖަލްސާގައި، ރަޝިއަން ފެޑަރޭޝަނަށް އަބްދުއްރަހީމް އަބްދުއްލަތީފް އައްޔަނުކުރުމަށް 65 މެންބަރުން ވޯޓު ދެއްވާފައިވާއިރު، މޮރޮކޯއަށް ސަރީރު އައްޔަނުކުރުމަށް ފާސްކޮށްފައިވަނީ ވޯޓުގައި ބައިވެރިވި 64 މެންބަރުންގެ އިއްތިފާގުންނެވެ.

ރައީސް މުއިއްޒު ވެރިކަމުގެ ސިފައިންގެ ޗީފަކަށް އައްޔަން ކުރައްވާފައިވާ އަބްދުއްރަހީމް އެ މަގާމުން ރިޓަޔާ ކުރައްވާފައިވަނީ 2024 ވަނަ އަހަރުގެ އޭޕްރީލް މަހުގައެވެ. 

ކުރިން ފޮރިން ސެކްރެޓަރީގެ މަޤާމު އަދާކުރެއްވި ސަރީރު ވަނީ އދ. އަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބުގެ މަޤާމާއި އެމެރިކާއަށް ރާއްޖެއިން ކަނޑައަޅުއްވާފައި ހުންނަވާ ސަފީރުގެ މަޤާމުވެސް ފުރުއްވާފައެވެ.

އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) އަދި މިސްރަށް ކަނޑައަޅާ ނޮން ރެޒިޑެންޓް ސަފީރުކަމަށް އައްޔަނުކުރުމަށް ވެސް މަޖިލީހުން ވަނީ ދާދިފަހުން އޭނާއަށް ރުހުން ދީފައެވެ.