ޣައްޒާއަށް ހިއުމެނިޓޭރިއަން އެއިޑް -- އިންސާނީ އެހީ އެތެރެވުން ހުއްޓާލުމަށް އިސްރާއީލުން ނިންމި ނިންމުން ދިވެހި ސަރުކާރުން ވަރަށް ހަރުކަށި އިބާރާތުން ކުށްވެރި ކޮށްފި އެވެ.

ދިވެހި ސަރުކާރުން އެކަން ކުށްވެރި ކޮށްފައި ވަނީ މިއަދު ނެރުނު ބަޔާނެއްގަ އެވެ.

ފޮރިން މިނިސްޓްރީން ނެރުނު ބަޔާނުގައި ބުނީ މިއީ ހަނގުރާމަ ހުއްޓާލުމުގެ އެއްބަސްވުމާއި، ބައިނަލްއަޤްވާމީ ޤާނޫނުތަކާ، އިންސާނީ ޙައްޤުތަކާ ކަނޑައެޅިގެން ޚިލާފު ޢަމަލެއް ކަމަށެވެ.

Advertisement

އިސްރާއީލުން ހިންގާ މިފަދަ ބޮޑެތި ޖަރީމާތައް ހުއްޓާލުމަށާއި، ބައިނަލްއަޤްވާމީ މުޖުތަމަޢުތައް ޖަވާބުދާރީކުރުވުމުގެ ނިޒާމުތައް ޒިންމާދާރު ކުރުވުމަށް ވެސް ގޮވާލާފައިވެ އެވެ. އަދި ޣައްޒާގެ ހުރިހާ ސަރަޙައްދަކަށް ރައްކާތެރިކަމާއެކު، ދެމެހެއްޓެނިވި ގޮތެއްގައި އަދި ހުއްޓުމެއްނެތި އިންސާނީ އެހީތެރިކަން ފޯރުކޮށްދިނުމަށް ބައިނަލްއަޤްވާމީ މުޖުތަމަޢަށް ރާއްޖެއިން ވަނީ ގޮވާލާފަ އެވެ.

މި ހަމަނުޖެހުމަށް ދެމެހެއްޓެނިވި އަދި ޢަދުލުވެރި، ޞުލްޙަވެރި ޙައްލެއް ލިބޭނީ 1967 ގެ ކުރީގެ ސަރަޙައްދުތަކުގެ މައްޗަށް ބިނާކޮށް، އިރުމަތީ ޤުދުސްއަކީ ވެރިކަންކުރާ ރަށްކަމުގައި ކަނޑައަޅައި، މިނިވަން އަދި މުސްތަޤިއްލު ފަލަސްޠީނު ދައުލަތެއް ޤާއިމްކުރެވިގެން ކަމުގައި ދިވެހިރާއްޖެއިން ދެކޭ ކަމަށް ވެސް ބުންޏެވެ.

ހައްދުފަހަނައަޅާފައިވާ އިޒްރޭލުން ގެންދަނީ ފަލަސްތީނާއި އެ ގައުމުގެ ޣައްޒާގައި ވަރުގަދަ ގަތުލު އާންމެއް ހިންގަމުންނެވެ. ހަމަލާތައް ބަދަލު ކުރުން ވަގުތީ ގޮތުން ހުއްޓާލުމަށް ފަހު އަލުން ޖަރީމާާތައް ފެށުމުގެ ކޮޅުމަތި ދަނީ ދައްކަމުންނެވެ.