މަޖިލީހުގެ ކޮމެޓީ ތަކުން މެމްބަރުން އެއްކޮމެޓީން އަނެއް ކޮމެޓީ އަށް ބަދަލު ކުރުމަކީ ޕާލިމެންޓްރީ ގްރޫޕްތަކުގައި އަބަދުވެސް ހިނގާ ކަމެއް ކަމަށާ އެއީ އާ ކަމެއް ނޫން ކަމަށް ޕީއެންސީގެ ޕީޖީ ގުރޫޕްގެ ލީޑަރު އިބްރާހިމް ފަލާހު ވިދާޅުވެއްޖެ އެވެ.

އޭނާ މިހެން ވިދާޅުވީ މަޖިލީހުގެ މުހިންމު ދެ ކޮމިޓީއެއް ކަމަށްވާ، މާލިއްޔަތު ކޮމިޓީއާއި ސަލާމަތީ ޚިދުމަތްތަކާ ބެހޭ ކޮމިޓީ، 241 ކޮމިޓީން ހިތަދޫ މެދު ދާއިރާގެ މެންބަރު އަހުމަދު އަޒާން ވަކިކޮށްފައި ވަނިކޮށެވެ. 241 ކޮމިޓީއާއި މާލިއްޔަތު ކޮމިޓީން ވަކިކޮށްފައި މިވަނީ، ޕާޓީގެ ވިޕްލައިނާ ޚިލާފަށް ވޯޓު ދިނުމުން އޭނާއަށް ފިޔަވަޅު އަޅަމުންދާ ވަގުތެއްގަ އެވެ.

އެކަމާއި ގުޅިގެން ދެކެވޭ ވާހަކަތަކަށް ރައްދު ދެއްވާ ފަލާހު ވިދާޅުވީ ޕީޖީ ގުރޫޕުގެ އަދަދާއި ކޮމެޓީތަކުގެ އަދަދާއި، މެންބަރުން ކޮމެޓީގެ ހާޒިރީއަށް ދެއްވާ އަހްމިއްޔަތުކަމާއި، ކޮމެޓީގެ މަސައްކަތަށް ދެއްވާ ސަމާލުކަން ފަދަ ކަންކަމުގެ މަައްޗަށް ބިނާ ކޮށް އެކި ކޮމެޓީތަކަށް އެކި މެންބަރުން އެކި އިރު ބަދަލު ގެނައުމަކީ 17 ވަނަ މަޖިލީހާއި 18  އަދި 19 ވަނަ މަޖިލީހުގައި ވެސް އާންމުކޮށް ހިނގާފައި ހުންނަ ކަންކަން ކަމަށެވެ.

"އެހެން ކަމުން 20 ވަނަ މަޖިލީހުގައި ވެސް މިފަދަ ބަދަލުތައް ގެނެވިފައިވޭ. އަދި ކުރިއަށް އޮތްތާނގައިވެސް، ކޮމެޓީތަކަށް އެ ވަގުތަކަށް ބޭނުންވާ ބަދަލުތަައް އަންނަމުން ދާނެ," ޕީއެންސީގެ ނިންމުން ދެކޮޅު ޖެއްސުމަށް މަސައްކަތް ކުރައްވާ ފަލާހު ވިދާޅުވި އެވެ.

އަޒާންގެ ބަދަލުގައި މާލިއްޔަތު ކޮމިޓީއަށް ހަމަޖައްސާފައިވަނީ ހެންވޭރު އުތުރު ދާއިރާގެ ޕީއެންސީ މެންބަރު، އަހުމަދު އައިފާން އެވެ. އަދި 241 ކޮމިޓީއަށް އައްޔަން ކުރީ ވިލިމާލޭ ދާއިރާގެ މެންބަރު މުހައްމަދު އިސްމާއީލެވެ.

އެ ދެ ކޮމިޓީގެ ބަދަލުގައި އަޒާން އައްޔަން ކޮށްފައިވަނީ ޕެޓިޝަން ކޮމިޓީ އާއި އިމްތިޔާޒާއި ސުލޫކު ކޮމިޓީ އަށެވެ.