މި ސަރުކާރުން ސްޕްރީމްކޯޓުގައި ތަޅު އަޅުވާފައިވާ ކަމަށްބުނެ އެކަން ކުށްވުރިކޮށް އެމްޑީޕީން މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލައިފިއެވެ.
މި ކުއްލި މައްސަލަ ހުށަހެޅުއްވީ ހުޅުމާލޭ ދެކުނު ދާއިރާގެ އެމްޑީޕީ މެންބަރު ޑރ. އަހުމަދު ޝަމްހީދެވެ.
ޝަމްހީދުގެ މައްސަލާގައި ވިދާޅުވީ، އަދުލު އިންސާފު ގާއިމް ކުރުމުގެ ބާރުގައި މަރުތަޅު އަޅުވައި، ސްޕްރީމް ކޯޓުގެ ތިން ފަނޑިޔާރުން ސަސްޕެންޑުކޮށް އަދުލު އިންސާފަށް ނުފޫޒް ފޯރުވަން ސަރުކާރުކާރުން މަސައްކަތް ކުރާ ކަމަށާ، އެކަމާ ކަންބޮޑުވެލައްވާ ކަމަށެވެ.
އަދި ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނު އަސާސީއަށް ގެނުވުނު ބަދަލު އުވާލުމަށް ސްޕްރީމް ކޯޓަށް މައްސަލައެއް ހުށަހަޅާފައި ވަނިކޮށް، އެ މައްސަލަ ބަލައިގަތުމަށް ސްޕްރީމް ކޯޓުން ނިންމުމާއެކު ފަނޑިޔާރުންގެ ސުލޫކީ މައްސަލަ ބަލަން ފަށާފައިވާ ކަމަށް އޭނާ ވިދާޅުވިއެވެ.
"ގާނޫނުއަސާސީގެ ހަވަނަ އިސްލާހު ގެނައުމުގެ ގާނޫނާއި ގުޅޭ ހައްސާސް މައްސަލައެއް ދިވެހިރާއްޖޭގެ ސުޕްރީމް ކޯޓުން ބަލަމުންދާ ދަނޑިވަޅެއްގައި އެ ކޯޓު އެކުލެވިގެންވާ ގޮތުގެ ބަދަލު ގެނައުމުގެ މަސައްކަތްކޮށް ވުޖޫދުގައި ނެތް ސުލޫކީ މައްސަލަތަކެއް އުފައްދާ އެ ކޯޓުގެ ފަނޑިޔާރުން މަގާމުގެ މަސައްކަތުން އެކަހެރިކުރުމަކީ ސުޕްރީމް ކޯޓުން ބަލަމުންދިޔަ މައްސަލައަކަށް ނުފޫޒު ފޯރުވުމުގެ ނިޔަތުގައި ކުރި އަމަލެއްކަން ހާމަވާން އޮތް ހިނދު،" ކުއްލި މައްސަލައިގައި ޝަމްހީދު ވިދާޅުވި އެވެ.
މިއާއެކު ޝަމްހީދު ވަނޫ، އެފަދައިން ފަނޑިޔާރުންގެ މަސައްކަތާ ބެހުމަކީ ގާނޫނު އަސާސީއާވެސް ޚިލާފް ކަމެއް ކަން ފާހަގަކުރައްވައި، އެކަން ކުރުން ހުއްޓާލުމަށް ގޮވާލައްވާފައެވެ.
މި ކުއްލި މައްސަލައަށް ބަހުސްކުރަން ފެންނަ ކަމަށް 11 މެންބަރުން ވޯޓު ދެއްވިއިރު ނުފެންނަ ކަމަށް 46 މެންބަރުން އަދި ވަކިކޮޅަކަށް ވޯޓު ދޭން ބޭނުން ނުވާ ކަމަށް އެއް މެންބަރު ވޯޓު ދެއްވި އެވެ. އެހެންކަމުން މަޖިލީހުން ވަނީ މައްސަލަ ބޭރުކޮށްލާފައެވެ.
Advertisement
This content is created and paid for by advertisers and does not involve Voice Journalists
