ރައްޔިތުންގެ މަޖިލީހުގެ މަސައްކަތަކީ ހަމައެކަނި ތަޅުމުގައި ކުރާ މަސައްކަތެއްނޫން ކަމަށާ، މަޖިލީހުގެ މަސައްކަތް ކުރިއަށްދާއިރު ގިނަ މެންބަރުން ތަޅުމުން ނުފެންނަނީ، ކޮމެޓީތަކުގައި މަސައްކަތް ކުރަމުންދާތީ ކަމަށް މަޖިލީހުގެ ރައީސް އަބްދުއްރަހީމް ‏⁦އަބްދުالله ވިދާޅުވެއްޖެއެވެ

މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން އަބްދުއްރަޙީމް ވިދާޅުވީ މިއަދުވެސް މަޖިލީހުގެ ފަސް ކޮމިޓީއެއްގެ މަސައްކަތް ކުރިއަށްދާނެ ކަމަށެވެ. 

މިއާއެކު އަބްދުއްރަހީމް ވިދާޅުވީ ފަސް ކޮމިޓީއެއްގެ މަސައްކަތް ކުރިއަށްދާއިރު، އެ ކޮމިޓީތަކުގައި 55 މެންބަރުން މަސައްކަތް ކުރައްވާނެ ކަމަށެވެ. 

އަދި ތަޅުމުގައި ކުރާ މަސައްކަތް ނިމުމަކީ މަޖިލީހުގެ މެންބަރުންގެ މަސައްކަތް ނިމުން ނޫން ކަމަށާ، މަޖިލީހުގެ މެންބަރުންގެ މަސްއޫލިއްޔަތުގެ ތެރެއިން، ތަޅުމުގެ މަސައްކަތް ނިމުމުން ކޮމިޓީގެ މަސައްކަތް ފެށިގެންދާނެ ކަމަށް ވިދާޅުވިއެވެ. 

އެހެން ކަމުން އާއްމު ރައްޔިތުންގެ ސަމާލުކަމަށް އެ މައުލޫމާތު ދެއްވީ ކަމަޢް އެމަނިކުފާނު ވިދާޅުވުއެވެ. 

އަބްދުއްރަހީމް މިހެން ވިދާޅުވެފައި ވާއިރު، މިއަދުގެ ޖަލްސާއަށް ތަޅުމަށް ހާޒިރުވެވަޑައިގެންނެވީ 43 މެންބަރުންކަމަށް ޖަލްސާ ފަށްޓަވަމުން އެމަނިކުފާނު ވިދާޅުވިއެވެ.