ސްރީލަންކާގެ އީސްޓަރން ޕްރޮވިންސްގައި ހައްދުފަހަނައެޅި ފިކުރުގެ މުސްލިމް ޖަމާޢަތެއް އުޅޭކަމަށް ޖާސޫސީ މައިލޫމާތު ލިބިފައިވާކަމަށް އެގައުމުގެ ކެބިނެޓް ސްޕޯކްސްޕަރސް ވިދާޅުވެއްޖެއެވެ.

ލަންކާ މީޑިއާއާ ވާހަކަ ދައްކަވަމުން ކެބިނެޓް ސްޕޯކްސްޕަރސަން އަދި ހެލްތު އެންޑް މާސް މީޑިއާ މިނިސްޓަރ ނަލިންދަ ޖަޔަތިއްސަ ވިދާޅުވީ އެޖަމާޢަތާއި ބެހޭ އިތުރު މައުލޫމާތު ހޯދައި، އަޅަން ޖެހޭ ފިޔަވަޅުތައް އެޅުމުގެ މަސައްކަތް ލަންކާގެ ފުލުހުންގެ އިންޓެލިޖެންސާއި ލަންކާގެ ސަލާމަތީ ބާރުތަކުން ކުރަމުންދާ ކަމަށެވެ. އަދި މި ކަމާ ބެހޭ މައުލޫމާތު ލަންކާގެ ރައީސް ޑިސަނަޔަކަ މިހާރު ގާނޫނު ހަދާ މަޖިލީހާއިވެސް ހިއްސާކުރައްވާފައިވާކަމަށް އޭނާ ވިދާޅުވިއެވެ.

އިރުމަތީ ލަންކާގެ މުސްލިމުންގެ ބައިގިނަ ކަލްމުނައި ސަރަހައްދުގައި ހައްދުފަހަނައެޅި ފިކުރުގެ ބަޔަކު އެމީހުންގެ ފިކުރު ފަތުރަން މަސައްކަތްކުރަމުންދާކަމުގެ މައުލޫމާތު ލިބިފައިވާކަން އެންމެ ފުރަތަމަ ހާމަކުރެއްވީ ނިމުނު ހަފްތާ ބަންދުގައި ޕަބްލިކް ސޭފްޓީ މިނިސްޓަރ އާނަންދަ ވިޖެޕާލައެވެ. އޭނާ ވިދާޅުވީ އެޖަމާޢަތާއި ބެހޭ މައުލޫމާތު ލަންކާގެ މިލިޓަރީ އިންޓެލިޖެންސަށާއި، ސްޓޭޓް އިންޓެލިޖެންސް ސަރވިސްއަށް ލިބިފައިވާކަމަށެވެ. އެގޮތުން ކަލްމުނާއީގެ މިސްކިތްތަކުގައި ކުޑަކުދިންގެ ހިތުގައި އިސްލާމް ދީނާއި ޚިލާފު، ހައްދުފަހަނައެޅި ފިކުރުތައް އަށަގެންނެވުމުގެ މަސައްކަތް އެ ގްރޫޕުން ކުރަމުންދާކަން ފާހަގަކުރެވިފައިކަމަށް ވިޖެޕާލަ ވިދާޅުވިއެވެ.

Advertisement

2019 ވަނަ އަހަރު ލަންކާގެ ވެރިރަށް ކޮޅުނބުގެ އެކި ހިސާބުތަކަށް ހައްދުފަހަނައެޅި ބަޔަކު ދިން ޙަމަލާތަކަށްފަހު، އިރުމަތީ ޕްރޮވިންސްގައި ހިންގާ ހައްދުފަހަނައެޅި ފިކުރުގެ ޖަމާއަތްތަކުގެ ހަރަކާތްތައް ލަންކާގެ ޖާސޫސީ އިދާރާތަކުން މޮނީޓަރ ނުކުރާ މައްސަލައިގައި އެ އިދާރާތަކަށް ފާޑުކިޔުން އަމާޒުވެފައިވެއެވެ.