ޣައްޒާގެ ދެ މިލިއަނަށްވުރެ ގިނަ ރައްޔިތުންނަށް އިސްރާއީލުން ފޯރުކޮށްދެމުން އައި ކަރަންޓުގެ ޚިދުމަތް ވަގުތުން ކަނޑާލުމަށް އިސްރާއީލުގެ އެނަރޖީ މިނިސްޓަރު އެލީ ކޯހެން އަންގައިފިއެވެ.

މިކަން އޭނާ ކަށަވަރުކޮށްދީފައިވަނީ އެކްސްގައި ކުރި ޕޯސްޓެއްގައެވެ.

"ވާހަކަދެއްކުމުގެ ވަގުތު މިހާރު ވަނީ ހަމަވެފައި. މިހާރު މިއީ ޢަމަލީ ގޮތުން ކަންތައްތައް ކުރުމުގެ ވަގުތު!" އޭނާ ބުނެފައިވެއެވެ.

Advertisement

މި އިޢުލާނު އައިސްފައިމިވަނީ، އިސްރާއީލުން ޣައްޒާއަށް ފޯރުކޮށްދެމުން އައި ހުރިހާ މުދަލެއްގެ ސަޕްލައި ހުއްޓާލިތާ ހަފްތާއެއް ފަހުންނެވެ.

ޤަތުލު އާއްމުގެ ކުރިން ޣައްޒާއަށް ބޭނުންވާ ކަރަންޓުގެ ބޮޑު ބައެއް ލިބެމުން އައީ އިސްރާއީލުންނެވެ. ނަމަވެސް 2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުން ވަނީ ކަރަންޓު ސަޕްލައި ބޮޑުތަނުން މަދުކޮށްފައެވެ. އަދި ޣައްޒާގެ ހަމައެކަނި ކަރަންޓު އުފައްދާ ޕްލާންޓަށް ބޭނުންވާ ތެޔޮ ވެސް ހިފަހައްޓާފައެވެ.

އިސްރާއީލް ހަޔޯމް ނޫހުން ފާއިތުވި އާދީއްތަ ދުވަހު ރިޕޯޓުކުރި ގޮތުގައި، ހަމާސްއިން ގަތުލް އާއްމު މެދުކަނޑާލުމުގެ އެއްބަސްވުމުގެ ފުރަތަމަ ފިޔަވަހި އިތުރަށް ދިގުކުރުމަށް އެއްބަސްނުވާނަމަ، އިސްރާއީލުގެ ސަރުކާރުން ޣައްޒާގެ ކަރަންޓާއި ފެން ކަނޑާލާނެއެވެ.

އަދި އިސްރާއީލްގެ ނިރުބަވެރި ބޮޑުވަޒީރު ނަތަންޔާހޫ ހުރީ ގަތުލް އާއްމު އެއްކޮށް ނިންމުމަށް އެއްބަސްވުމަށް ތައްޔާރަށް ނޫން ކަމަށްވެސް އެ ނޫހުން ރިޕޯޓް ކޮށްފައިވާއިރު، އެހެން އެއްބަސް ނުވަނީ އެކަމުގެ ސަބަބުން ހަމާސް ބާރުގަދަ ވާނެތީ ކަމަށް ބުނެފައިވެއެވެ.