އުރީދޫ މޯލްޑިވްސްގެ އަހަރީ އާންމު ޖަލްސާގައި، މިދިޔަ އަހަރު ލިބުނު ފައިދާއިން ހިއްސާއަކަށް 3.43 ރުފިޔާ ފައިދާގެ ގޮތުގައި ބަހަން ފާސްކޮށްފިއެވެ.

އާދިއްތަ ދުވަހުގެ ރޭގައި ބޭއްވި އެ ޖަލްސާ އޮތީ ހުޅުމާލޭގައި ހުންނަ އެ ކުންފުނީގެ މައި އޮފީހުގައެވެ.

އުރީދޫއިން ބޭއްވި އެ ޖަލްސާގައި އެ ކުންފުނީގެ މުޅި ހިއްސާގެ 90.85 އިންސަތަ ބައިވެރިން ބައިވެރިވިކަމަށް އެ ކުންފުނިން ބުނެއެވެ. އެގޮތުން އެ ޖަލްސަގައި 74 ހިއްސާދާރުން ބައިވެރި ވެފައިވެއެވެ.

އުރީދޫއިން ބުނެފައިވާގޮތުން، 74 ހިއްސާދާރުންގެ ތެރެއިން 60 ހިއްސާދާރުން ބައިވެރިވެފައިވަނީ އަމިއްލައަށް ކަމަށާ، 11 ޕުރޮކްސީން އަނެއް 14 ހިއްސާދާރުން ތަމްސީލުކުރިއެވެ. 

އުރީދޫއިން ބުނީ އޭޖީއެމްގެ އެޖެންޑާގައި ހުށަހަޅާފައިވާ ގޮތަށް، 7 މާޗް 2024 ގައި ބޭއްވި އަހަރީ އާންމު ޖަލްސާގެ ލިޔެކިޔުންތަކާއި، އެއަހަރުގެ 15 ޑިސެމްބަރު ގައި ބޭއްވި ޖަލްސާގެ ލިޔެކިޔުންތަކާއި އަދި ހަމަ އެއަހަރުގެ އޮޑިޓަރުންގެ ރިޕޯޓާއެކު އޮޑިޓްކޮށްފައިވާ މާލީ ބަޔާންތައް އެޖަލްސާގައި ފާސްކުރި ކަމަށެވެ.

އެ ކުންފުނިން ބުނީ ރޭގެ ޖަލްސާގައި އުރީދޫގެ މައި ހިއްސާދާރު ކަމަށްވާ ވަތަނިއްޔާ އިންޓަނޭޝަނަލް ތަމްސީލުކުރައްވާ ބޭފުޅުން ވެސް އުރީދޫގެ ބޯޑަށް އަލުން ހޮވާފައިވާކަމަށެވެ. އެ ހޮވި ބޭފުޅުންނަކީ ޖޯޖް ބޮވްރިން ޗެލެނާއި، ވިކްރަމް ސިންހާ އަދި މޯޒާ މުހައްމަދު އޭވައި ދާވިޝްއެވެ.

މިއަހަރަކީ އުރީދޫން މިހާތަނަށް ހިއްސާއަކަށް އެންމެ ބޮޑު އަދަދެއް ދޫކުރި އަހަރެވެ. ދެން އެންމެ ބޮޑު އަދަދެއް ދޫކުރީ 2019ވަނަ އަހަރު އެވެ. އެއަހަރު ހިއްސާ އަކަށް 3.30 ރުފިޔާ ބަހާފައިވެ އެވެ.