އުތުރުން ފެށިގެން މެދުރާއްޖޭގެ ރަށްތަކަށް މިރޭ މޫސުން ގޯސްވާނޭކަމަށް މޫސުމާބެހޭ އިދާރާއިން ލަފާކޮށްފިއެވެ.
މެޓް އޮފީހުން ވަނީ މިރޭ ހއ އަތޮޅުން ފެށިގެން ރ އަތޮޅަށް ވައިޓް އެލާޓް ނެރެފައެވެ. މިރޭގެ 10 އަކުން ފެށިގެން ފަތިހު 4 ޖެހުމާ ހަމަޔަށް ވައިޓް އެލާޓް ނެރެފައިވާ ސަރަހައްދަށް ބޯކޮށް ވާރޭވެހުމާއެކު ގުގުރާނޭކަމަށް މެޓް އޮފީހުން ވަނީ ލަފާކޮށްފައެވެ.
މީގެ އިތުރުން މެޓް އޮފީހުން ވަނީ މިރޭގެ 11:30 ހުން ފެށިގެން ފަތިހު 4 ޖެހުމާ ހަމަޔަށް ރ އަތޮޅުން ފެށިގެން ވ އަތޮޅަށްވެސް ވައިޓް އެލާޓް ނެރެފައެވެ. ވައިޓް އެލާޓް ނެރެފައިވާ ސަރަހައްދުތަކަށް ބޯކޮށް ވާރޭވެހި، ގުގުރާނޭކަމަށް މެޓް އޮފީހުން ލަފާކޮށްފައިވާއިރު، މާލެއިން އުތުރުގެ އަތޮޅުތަކަށް ދިއުމަށް ބައެއް ބޯޓުތައް ފުރުމަށް އަންނަނީ ތައްޔާރުވަމުންނެވެ.
ރާއްޖޭގެ ކަނޑުދަތުރުފަތުރުގެ ދާއިރާގައި ހިނގާފައިވާ ހާދިސާތަކަށް ބަލާއިރު، މިކަހަލަ ވިއްސާރަ ރޭރޭ، މާލެދަތުރުކުރާ ބައެއް ބޯޓުފަހަރު ފަރަށް އެރުމުގެ ހާދިސާތައް ހިނގާފައި އެބަހުއްޓެވެ.
Advertisement
This content is created and paid for by advertisers and does not involve Voice Journalists
