ރޯދަމަސް ފެށެން ކައިރިވެފައި ވަނިކޮށް ފަލަސްޠީނުގެ ޣައްޒާއަށް ކާބޯތަކެތި އެތެރެ ކުރުމަށް ނިރުބަވެރި އިސްރާއިލުން ހުރަސް އެޅުމާއެކު، އެ ސަހަރުގައި ދިރިއުޅޭ 2.3 މިލިޔަނެއްހާ މީހުން، އަދި ޚާއްޞަ ގޮތެއްގައި ނިކަމެތީންގެ ހާލަތު އެތަކެއް ގުނައަކަށް ދަށްވެފައިވާ ކަން ފަލަސްޠީނުގެ ކަމާބެހޭ އިދާރާތަކުން ހާމަކޮށްފިއެވެ.

ރޯދަމަހުގެ 10 ދުވަސް ފާއިތުވެގެން ގޮސްފައިވާއިރު، ކާބޯތަކެތި އުފައްދާ ބޭކަރީތަކަށް ބޭނުންވާ ތަކެތިވެސް އެތަންތަނަށް ލިބޭނެ މަގު އިސްރާައިލުން ވަނީ ބަންދުކޮށްފައެވެ. އެގޮތުން، ޣައްޒާގެ ރައްޔިތުންނަށް ކާބޯތަކެތި ފޯރުކޮށްދިނުމަށް 22 ބޭކަރީއެއް މަސައްކަތް ކުރަމުންދާއިރު، އެ ތަންތަން ބަލަހައްޓާ ޔޫނިއަނުން ބުނެފައިވާގޮތުން ކައްކާ ގޭސް ހުސްވުމާ ގުޅިގެން އޭގެ ތެރެއިން ހަ ބޭކަރީ ބަންދު ކުރަން ވަނީ މަޖުބޫރުވެފައެވެ. 

"ބާކީ ހުރި ބޭކަރީތައް ވެސް ހަފުތާއެއްހާ ދުވަހުގެ ތެރޭގައި ބަންދު ކުރަން ޖެހޭނެ، އެ ތަންތަނުން ތެލާއި ފުށް ދަނީ ހުސްވަމުން، އެ ކަން ހުއްޓުވޭނީ ކާބޯތަކެތި އެތެރެ ކުރަން ފުރުޞަތު ދީގެން،" އެ ޔޫނިއަންގެ ވެރިޔާ ޢަބްދުއްނާޞިރު ޢަޖްރަމީ ބުންޏެވެ.

Advertisement

ކާބޯތަކެއްޗަށް ހުރަސް އެޅުމުގެ އިތުރުން ޔަހޫދީން ވަނީ ޣައްޒާއިން ކަރަންޓުގެ ޚިދުމަތް ވެސް މެދުކަނޑައިލާފައެވެ. އޭގެ ސަބަބުން، ޣައްޒާގެ ރައްޔިތުންނަށް ސާފު ބޯފެން ފޯރުކޮށްދިނުމަށް ބޭނުންކުރާ ފެން އުފައްދާ ޕްލާންޓްތަކުގެ މަސައްކަތް ހުއްޓި ސާފު ބޯފެން ލިބުމަށް ވެސް މި ވަނީ ހުރަސް އެޅިފައެވެ.

"އަޅުގަނޑުމެންނަށް ދިރިއުޅެން ޖެހިފައި މި ވަނީ ކޮން ފަދަ ނިކަމެތި ހާލަތެއްގައި؟ ކަރަންޓެއް ނެތް، ފެނެެއް ނެތް، ދިރިއުޅެވޭނެ ގޮތެއް ނެތް، އެހެންވީމަ ޙަޤީޤަތަކުގައި ދިރިހުރުމެއް ވެސް ނެތް. ޙަޔާތުގައި ބާކީ އޮތީ ދެން ކޮން ކަމެއް؟" ޣައްޒާގެ ޚާން ޔޫނިސްގެ ފޭލިގެއެއްގައި ދިރިއުޅޭ ހަ ކުދިންގެ މަންމައަކު ބުނެފައިވެއެވެ. 

ކާބޯތަކެއްޗާއި ސާފު ބޯފެން ލިބޭނެ މަގު ބަންދު ކުރުމުގެ އިތުރުން، އިސްރާއިލުން ވަނީ ބޭސްފަރުވާއަށް ބޭނުންވާ ސާމާނާއި އިނޖީނުގެތައް ހިންގުމަށް ބޭނުންވާ ތެޔޮ އެތެރެ ކުރުމަށް ވެސް ހުރަސް އަޅާފައެވެ.

އޮކްޓޯބަރ 7 ވަނަ ދުވަހުން ފެށިގެން އިސްރާއިލުން ހިންގަމުންދިޔަ ގަތުލު އާއްމު ހުއްޓާލާފައިވަނީ މި އަހަރުގެ ޖަނަވަރީ މަހުގެ ތެރޭގައެވެ. 15 މަސް ދުވަހަށް ދެމިގެންދިޔަ ގަތުލު އާއްމުގައި 48,000 އަށްވުރެ ގިނަ މީހުންވަނީ ޝަހީދުވެފައެވެ. މީގެ ތެރެއިން 17,000 އަށް ވުރެ ގިނައީ ކުޑަކުދިންނެވެ. މީގެ އިތުރުން އިސްރާއީލްގެ އެ ޖަރީމާތަކުގައި 110,750 މީހުނަށް އެކިވަރުގެ އަނިޔާތައް ލިބިފައިވާއިރު، 11 ހާހަށްވުރެ ގިނަ މީހުން ވީއެއްނުވީއެއް ނޭނގި ގެއްލިފައިވާކަމަށް އަލްޖަޒީރާއިން ބުނެއެވެ.