ސްޕެނިޝް ލަލީގާގައި އާދިއްތަ ދުވަހުގެ ރޭ ރަށުން ބޭރުގައި 4-2 ގެ ނަތީޖާއަކުން އެތްލެޓިކޯ މެޑްރިޑް ބަލިކޮށް ބާސެލޯނާ އިން ލީގު ތާވަލުގެ އެއްވަނައަށް ކުރިއަށް ޖެހިލައިފިއެވެ.
ލީގުގައި ބާސެލޯނާ އެންމެ ފަހުން ކުޅުނު މެޗުގައި 4-0 ގެ ނަތީޖާއަކުން ރެއާލް ސޮސިއެޑާޑް އަތުން މޮޅުވެފައިވާއިރު، އެތްލެޓިކޯ އެންމެ ފަހުން ކުޅުނު މެޗުގައި ގެޓާފޭ އަތުން 2-1 ގެ ނަތީޖާއަކުން ވަނީ ބަލިވެފައެވެ. އަދި މިދެޓީމުނަ އެންމެ ފަހުން ކުޅުނު މެޗު ނިމިފައިވަނީ 4-4 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަމަ ލަނޑުޖަހައި ކުރިހޯދީ އެތްލެޓިކޯ މެޑްރިޑުންނެވެ. މިލަނޑު ފުރަތަމަ ހާފުގެ 45 ވަނަ މިނެޓުގައި ކާމިޔާބުކޮށްދިނީ ޖޫލިއަން އަލްވަރޭޒް އެވެ.
އެތްލެޓިކޯ އިން ލީޑު ފުޅާކުރި ލަނޑު ފަހުހާފުގެ 70 ވަނަ މިނެޓްގައި ކާމިޔާބުކޮށްދިނީ އެލެގްޒެންޑާ ސްލޮތް އެވެ. ނަމަވެސް އޭގެ ދެމިނެޓް ފަހުން ލެވަންޑޮސްކީ ވަނީ ލަނޑެއް ކާމިޔާބުކޮށް ބާސެލޯނާއަށް ފަރަގު ކުޑަކޮށްދީފައެވެ.
ބާސެލޯނާ އިން ނަތީޖާ އެއްވަރުކުރި ލަނޑު ފަހުހާގެ 78 ވަނަ މިނެޓުގައި ފެރާން ޓޮރޭސް ކާމިޔާބުކުރިއިރު، އެޓީމުން މެޗުގެ ލީޑުހޯދި ލަނޑު އިތުރު ވަގުތުގެ ދެވަނަ މިނެޓުގައި ކާމިޔާބުކޮށްދިނީ ލަމީން ޔަމާލް އެވެ. އަދި އިތުރު ވަގުތުގެ އަށްވަނަ މިނެޓުގައި އެޓީމުގެ ހަތަރުވަނަ ލަނޑު ކާމިޔާބުކޮށްދިނީ ފެރާން ޓޮރޭސް އެވެ.
މިނަތީޖާއެކު ލީގުގައި ކުޅުނު 27 މެޗުން އެޓީމަށް 60 ޕޮއިންޓް ލިބިފައިވާއިރު، މިމެޗުން ބަލިވި އެތްލެޓިކޯ މެޑްރިޑަށް 28 މެޗުން ލިބުނު 56 ޕޮއިންޓާއެކު އެޓީމު މިވަގުތު އޮތީ ލީގު ތާވަލުގެ ތިންވަނައިގައެވެ.
Advertisement
This content is created and paid for by advertisers and does not involve Voice Journalists
