ޤަތުލުޢާއްމު ހުއްޓާލުމަށް އިސްރާއީލުން ވި އެއްބަސްވުން ނިމުމަކަށް ގެނެސް، ޣައްޒާއަށް ވަރުގަދަ ހަމަލާތަކެއް ދޭން ފަށައިފިއެވެ.

ޣައްޒާގެ ސަރުކާރުގެ މީޑިއާ އޮފީހުން ބުނާ ގޮތުގައި މިއަދު ފަތިހު އިސްރާއީލުން ދިން ވައިގެ ހަމަލާތަކުގައި 200 އަށް ވުރެ ގިނަ ފަލަސްތީނު ރައްޔިތުން ވަނީ ޝަހީދުވެފައެވެ. މީގެ ތެރޭގައި ޣައްޒާގެ ދެކުނުގައި އޮންނަ ޚާން ޔޫނިސްގައި މަދުވެގެން 77 މީހުންނާއި، އުތުރުގައި އޮންނަ ޣައްޒާ ސިޓީގެ މަދުވެގެން 20 މީހުން ހިމެނެއެވެ.

ޝަހީދުވި ބައެއް މީހުންގެ ހަށިތައް: ފޮޓޯ/ ފަލަސްތީން އޮންލައިން

މިކަމުގެ ބަހަނާއެއް ކަމުހައި އިސްރާއީލުގެ ނިރުބަވެރި ބޮޑުވަޒީރު ބެންޖަމިން ނެތަންޔާހޫ ބުނީ، ޤަތުލުޢާއްމު ފެށިލީ ހަމާސްއިން އިސްރާއީލުގެ އަސީރުން ދޫކޮށްނުލުމާއި، ޤަތުލުޢާއްމު ހުއްޓާލުމުގެ މުއްދަތު އިތުރުކުރުމަށް އެއްބަސްނުވުމާ ގުޅިގެންނެވެ. އަދި މި ހަމަލާތައް ފަށާފައިވަނީވެސް ހަމާސްއާ ދެކޮޅަށް ކަމަށް ބުނެފައިވެއެވެ. 

"އިސްރާއީލުން ހަމާސްއާ ދެކޮޅަށް ދެން ބޭނުންކުރާނީ ސިފައިންގެ ބާރު،" އިސްރާއީލުގެ ބޮޑުވަޒީރުގެ އޮފީހުން ބުނެފައިވެއެވެ.

ހަމަލާތަކާއި ގުޅިގެން، ހަމާސްއިން ބުނެފައިވަނީ އިސްރާއީލުގެ މި ހަމަލާތަކަލާތަކަކީ ޖެނުއަރީ 19 ގައި ހަނގުރާމަ ހުއްޓާލުމަށް ވެވުނު އެއްބަސްވުން އިސްރާއިލުން ނިމުމަކަށް ގެނައުން ކަމުގައެވެ.

ކުއްލިއަކަށް ދޭން ފަށާފައިވާ މި ވަރުގަދަ ހަމަލާތަކާއި ގުޅިގެން ޣައްޒާގެ ރައްޔިތުންނަށް ސިހުން ގެނުވައި، އެމީހުން ތިބީ ބޮޑު ބިރުވެރި ކަމެއްގެ ތެރޭގައެވެ. 

ޝަހީދުވި ބައެއް މީހުންގެ ހަށިތައް: ފޮޓޯ/ ފަލަސްތީން އޮންލައިން

އެގޮތުން ގާޒާގެ ޓީޗަރެއް ކަމަށްވާ އަހްމަދު އަބޫ ރިޒްޤް ވިދާޅުވީ އޭނާއާއި އޭނާގެ އާއިލާއަށް ރޭ ހޭލެވުނީ "އިސްރާއީލުގެ ހަމަލާތަކުގެ އަޑުތަފަށްގަނޑަށް" ކަމަށެވެ.

"އަޅުގަނޑުމެން ވަރަށް ބޮޑަށް ބިރުގަތް. އަޅުގަނޑުމެންގެ ކުދިން ވެސް ބިރުގަތް. އަޅުގަނޑުމެންގެ ގާތްތިމާގެ މީހުން އަޅުގަނޑުމެންގެ ހާލު ބަލަން ގުޅަމުންދިޔަ. އެމްބިއުލާންސްތައް އެއް މަގުން އަނެއް މަގަށް ދުއްވަމުން ދިޔަ،" އަބޫ ރިޒްޤް އަލްޖަޒީރާއަށް ވިދާޅުވިއެވެ.

އަދި އެކިއެކި އާއިލާތަކުން އެމީހުންގެ "ދަރިންގެ ހަށިގަނޑުގެ ބައިތައް" ހިފައިގެން ހޮސްޕިޓަލަށް މިސްރާބު ޖަހާފައިވާތަންވެސް ފެނުނު ކަމަށް ވިދާޅުވިއެވެ. 

ނިރުބަވެރި އިސްރާއިލުން ހަމަލާތައް ފެށުމުގެ ކުރިންވެސް، އެމީހުން ވަނީ ޣައްޒާއަށް ދަތިކުރުމުގެ ފިޔަވަޅުތައް އަޅަންފަށާފައެވެ. އެގޮތުން، ޣައްޒާއިން ބޯފެނާއި، ކާބޯތަކެއްޗާއި، ކަރަންޓުގެ ޚިދުމަތް ވަނީ މެދުކަނޑާލާފައެވެ. އޭގެ ސަބަބުން މި ރޯދަމަހުގައިވެސް ޣައްޒާގެ ރައްޔިތުން އުޅެމުންއައީ ވަރަށް ދަތި ހާލުގައެވެ: