އިސްރާއީލް ސިފައިން ފަލަސްތީނުގެ ނަސްލު ނައްތާލުމަށް ހިންގަމުންދާ ގަތުލުއާއްމުތަކުގައި 3 ދުވަހުގެ ތެރޭގައި ޢައްޒާއިން 200 ކުޑަކުދިން ޝަހީދުކޮށްލައިފިއެވެ.

ހަމަލާތައް ބަދަލުކުރުން މެދުކަނޑާލުމުގެ އެއްބަސްވުމެއް ހަދާފައިވަނިކޮށް، އިސްރާއީލް ސިފައިން އެ އެއްބަސްވުމަށް އިހުތިރާމުނުކޮށް މިފަހުން ޢައްޒާއަށް ދޭންފެށި ހަމަލާތަކުގައި މުޅިންހެން ޝަހީދުވެފައިވަނީ އަންހެނުންނާއި ކުޑަކުދިންނެވެ. ޢައްޒާގެ ހެލްތު މިނިސްޓްރީން މިއަދު ބުނީ، އިސްރާއީލުން މިފަހުން ދޭންފެށި ހަމަލާތަކުގައި މިހާތަނަށް ފަލަސްތީނުގެ 506 މީހެއްގެ ފުރާނަ ގެއްލިފައިވާކަމަށެވެ. މީގެ ތެރޭގައި 200 ކުޑަކުދިން ހިމެނޭކަމަށް ފަލަސްތީނުގެ ހެލްތު މިނިސްޓްރީން ބުނެއެވެ.

އިސްރާއީލުން ދޭންފެށި ހަމަލާތަކުގައި މިއަދު އެކަނިވެސް ފަލަސްތީނުގެ 110 މީހެއްގެ ފުރާނަ ގެއްލިފައިވާއިރު، ބިމާހަމަވެފައިވާ އިމާރާތްތަކުގެ ދަށުގައި އަދިވެސް މީހުން ތިބުން އެކަށީގެންވާކަމަށް އަލްޖަޒީރާއިން ވަނީ ރިޕޯޓްކޮށްފައެވެ. 

ބައިނަލްއަޤްވާމީ އިންސާނީ ހައްޤުތަކާ ބެހޭ ޖަމިއްޔާ ޖަމާއަތްތަކުން ވަނީ އިސްރާއީލުން މިހާރު ޢައްޒާއަށް ދެމުންދާ ހަމަލާތަކަކީ އިންސާނިއްޔަތާ ހިލާފް ޖަރީމާތަކެއްގެ ގޮތުގައި ސިފަކޮށްފައެވެ. މިގޮތުން ހަމަލާތައް ދެމުންދަނީ ގޮތެއްފޮތެއް ބެލުމެއްނެތި އަންްހެނުންނާއި ކުޑަކުދިންނަށް އަމާޒުކޮށްކަމަށް ހިއުމަން ރައިޓްސް ވޮޗުން ވަނީ ބުނެފައެވެ.

ޢައްޒާއަށް ދޭންފެށި ހަމަލާތަކާ ގުޅޭގޮތުން އިސްރާއީލްގެ ހައްދުފަހަނަ އަޅާފައިވާ ބޮޑުވަޒީރު ބެންޔަމިން ނަތަންޔާހޫ ވިދާޅުވީ، ޢައްޒާއަށް ދެމުންދާ ހަމަލާތައް ހުއްޓާލުމުގެ ވިސްނުމެއް އަދި ނުގެންގުޅޭކަމަށާއި، މަޤްސަދު ހާސިލްވަންދެން ހަމަލާތައް ދެމުންދާނޭކަމަށެވެ.