އެމެރިކާއިން އީރާނަށް އިންޒާރުދީ، ދަތިކުރުމުގެ ފިޔަވަޅުތައް އަނެއްކާވެސް އެޅުމާއެކު އީރާނުން ރައްދު ދީފިއެވެ.
އީރާނުގެ ރޫޙީ ލީޑަރު އާޔަތުﷲ އަލީ ޚާމަނާއީ ވިދާޅުވީ އީރާނުން ވާގިވެރިވާ އަދި އެސަރަހައްދުގައި ހަރަކާތްތެރިވާ ޖަމާއަތްތައް ހަރަކާތްތެރިވަނީ އެމީހުންގެ އަމިއްލަ މިނިވަންކަމުގައި ކަމަށާއި، އީރާނުގެ ޕްރޮކްސީއެއްގެ ގޮތުގައި އެއްވެސް ޖަމާޢަތަކުން ނޫޅޭ ކަމަށެވެ. ޚާމަނާއީ އިޝާރާތްކުރެއްވީ ޔަމަނުގެ ޙޫޘީ ހަނގުރާމަވެރިންނަކީ އީރާނުގެ ޕްރޮކްސީންތަކެއް ކަމަށް އެމެރިކާއިން ބުނާ ބުނުމަށެވެ. ޙޫޘީން ދަނީ އީރާނުގެ ވާދަވެރި ސަޢޫދީ ޢަރަބިއްޔާއަށްވެސް ޙަމަލާ ދެމުންނެވެ. އަދި އިޒްރޭލުން ފަލަސްތީނުގެ ޣައްޒާއަށް ޙަމަލާދޭން ފެށުމުން އިޒްރޭލާއި ގުޅުން ހުރި އުޅަނދުފަހަރު ރަތް ކަނޑަށް ވަންނަ އިރު ނުވަތަ ނިކުންނައިރު، އެ އުޅަނދުފަހަރަށް ހޫޘީ ހަނގުރާމަވެރިން ދަނީ ހަމަލާދެމުންނެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ހޫޘީން ނައްތާލާނެކަމަށް ވިދާޅުވެ، އެމީހުންނާ ދެކޮޅަށް ހަނގުރާމަ އިއުލާނުކުރައްވާފައެވެ. އަދި އީރާނަށް މިދިޔަ ދެ މަހެއްހާ ދުވަސްތެރޭ 4 ފަހަރެއްގެ މަތިން ދަތިކުރުމުގެ ފިޔަވަޅުތައް އަޅާފައިވެއެވެ.
ހޯމަ ދުވަހު އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ ހޫޡީން ދޭ ހަމަލާތަކަށް އެމެރިކާއިން ޖަވާބުދާރީކުރުވާނީ އީރާންކަމާށެވެ.
Advertisement
This content is created and paid for by advertisers and does not involve Voice Journalists
