ދުނިޔޭގެ ފެންވަރުގައި މިރޭ އާރތް އަވަރ ފާހަގަކުރުމަށް ނިންމާފައިވާއިރު، އެ ހަރަކާތުގައި ހުރިހާ ފަރާތްތަކަކުން ބައިވެރިވުމަށް  ތިމާވެއްޓާބެހޭ ވުޒާރާއިން އެދެފިއެވެ.

މި ހަރަކާތާ ގުޅޭގޮތުން މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓު ގެޒެޓްގައި އާއްމުކުރި އިއުލާނެއްގައި ބުނެފައިވަނީ، އާރތް އަވަރ ފާހަގަކުރުމަށް ރަމްޒީގޮތުން ހިންގޭ ހަރަކާތުގައި ރާއްޖޭ ރައްޔިތުންނާއި ދިރިއުޅޭ ފަރާތްތަކުންނާއި، ވިޔަފާރި ކުންފުނިތަކާއި، އެކިއެކި މަދަނީ ޖަމިއްޔާތަކުން ބައިވެރިވުމަކީ އެ ވުޒާރާގެ އެދުމެއް ކަމަށެވެ.

އާރތް އަވަރ ފާހަގަކުރުމުގެ ޙަރަކާތް ހިންގުމަށް ހަމަޖެހިފައިވަނީ މިރޭ 09:45 އިން 10:45 އަށެވެ. އެގޮތުން، ކޮންމެހެން ބޭނުންކުރަންޖެހޭ ތަކެތި ފިޔަވާ އެހެން ހުރިހާ ދިއްލުންތައް މި ގަޑިއަށް ނިއްވާލައި، ދެމެހެއްޓެނިވި ގޮތެއްގައި ތިމާވެށި ޙިމާޔަތްކޮށް، ތިމާވެއްޓަށް އަންނަމުންދާ ބަދަލުތަކާއި އެ ބަދަލުތަކުގެ ސަބަބުން ނެތިގެންދާ ދިރުންތަކާއި، މާޙައުލީ ބަދަލުތަކަށް ހޭލުންތެރިކުރުވުމަށް ކުރާ މަސައްކަތްތަކަށް އެއްބާރުލުން ދިނުމަށް އެންމެން އެކުގައި މި ޙަރަކާތުގައި ބައިވެރިވުމުގެ މުހިންމުކަން ތިމާވެއްޓާބެހޭ ވުޒާރާއިން ވަނީ ފާަހަގަކުރެއެވެ.

މި ޙަރަކާތަކީ ދުނިޔެ ހޫނުވުމާއި، ތިމާވެއްޓަށް އަންނަމުންދާ ބަދަލުތަކާމެދު ޢާންމުންގެ މެދުގައި ހޭލުންތެރިކަން އިތުރުކޮށް، ތިމާވެށި ރައްކާތެރިކުރުމަށް ދުނިޔޭގެ ފެންވަރުގައި ކުރިއަށްގެންދާ ހަރަކާތެކެވެ. މި ޙަރަކާތަކީ ތިމާވެށީގެ ހޭލުންތެރިކަން އިތުރުކުރުމަށް ބައިނަލްއަގްވާމީ ގޮތުން ކުރިއަށްގެންދާ މުހިންމު ޕްލެޓްފޯމެކެވެ.

ތިމާވެއްޓާބެހޭ ވުޒާރާއިން ބުނީ، މި ޙަރަކާތުގެ މައިގަނޑު މަޤްޞަދަކީ، މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމާއި، ދިވެހިންގެ ޤުދުރަތީ ތަރިކަ ޙިމާޔަތްކުރުމަށް އެއްބައިވަންތަކަމުގެ އަޒުމް ދައްކުވައިދިނުމެވެ. އަދި ދުނިޔޭގެ އެކި ކަންކޮޅުތަކުން 60 މިނެޓުގެ ވަގުތަށް ރަމްޒީ 'ލައިޓް އައުޓް' ޕީރިއަޑެއްގައި ބައިވެރިވެ، ތިމާވެއްޓަށް އަންނަމުންދާ ބަދަލުތަކާ ދެކޮޅަށް މަސައްކަތްކުރުމަށް ވަކި ވަކި ފަރުދުންނާއި، އަމިއްލަ ކުންފުނިތަކާއި މަދަނީ ޖަމިއްޔާތަކުގެ ބައިވެރުވުމަށް ހިތްވަރު ދިނުންކަމަށެވެ.

އާރތް އަވަރ ފާހަގަކުރުމުގެ ގޮތުން މިދިޔަ އަހަރުތަކުގައިވެސް ދިއްލުންތައް ނިއްވާލުމުގެ ހަރަކާތް ވަނީ ކުރިއަށްގެންގޮސްފައެވެ.