އިސްރާއީލުގެ ހައްދުފަހަނަ އަޅާފައިވާ ސިފައިން ފަލަސްތީނުގެ ރައްޔިތުންނަށް ދެމުންގެންދާ ހަމަލާތަކުގައި ޢައްޒާގައި ހުރި ހަމައެކަނި ކެންސަރަށް ފަރުވާދޭ ހާއްސަ ހޮސްޕިޓަލަށް ހަމަލާދީ އެ ހޮސްޕިޓަލް ބިމާހަމަކޮށްލައިފިއެވެ.

މިކަމާ ގުޅޭގޮތުން ފަލަސްތީނުގެ ހެލްތް މިނިސްޓްރީން ބުނެފައިވަނީ އިސްރާއީލްގެ މި އަމަލަކީ، ހަނގުރާމައިގެ ބޮޑު ޖަރީމާއެއްކަމަށެވެ. ޢައްޒާގައި ހުންނަ މި ހޮސްޕިޓަލް ބިމާހަމަވެފައިވަނީ އިސްރާއީލް ސިފައިން އެތަނަށް މެދުނުކެނޑި ދިން ހަމަލާތަކުގައެވެ. ހޮސްޕިޓަލް ބިމާހަމަކޮށްލުމަށްފަހުވެސް އިސްރާއީލް ސިފައިން އެ ސަރެަހައްދަށް ހަމަލާތައް ދެމުންދިޔަކަމަށް އަލްޖަޒީރާއިން ވަނީ ރިޕޯޓްކޮށްފައެވެ.

އިސްރާއީލުން ވޭތުވެދިޔަ 24 ގަޑިއިރުގެ ތެރޭގައި ޢައްޒާއަށް ދިން ހަމަލާތަކުގައި 5 ކުޑަކުއްޖެއް ޝަހީދުވެފައިވާކަމަށް އަލް ޒަޒީރާއިން ބުނެފައިވާއިރު، މި ހަމަލާތައް މިހާރުވަނީ އިތުރަށް ވަރުގަދަކޮށްފައެވެ. ބައެއް ރިޕޯތްތައް ބުނާގޮތުގައި އިސްރާއީލް ސިފައިން މިހާރުދަނީ ގޮތެއްފޮތެއް ނުބަލައި ވަކި ޓާގެޓަކަށް އަމާޒުކުރުމެއްނެތި ޢައްޒާއަށް ހަމަލާތައްދެމުންނެވެ. އިސްރާއީލުން މިހާރު ޢައްޒާގައި ފަށާފައިވާ ގަތުލު އާންމާބެހޭގޮތުން އދ އިން ބުނެފައިވަނީ، ޢައްޒާއިން މިހާރު ފެނިގެންދަނީ ބިރުވެރި މަންޒަރުތަކެއް ކަމަށެވެ.

Advertisement

އިސްރާއީލުން މިދިޔަ ތިންދުވަހުގެ ތެރޭގައި ޢައްޒާއިން 700 އަށްވުރެ ގިނަ މީހުންގެ ފުރާނަ ގެއްލުވާލާފައިވާއިރު، މީގެ ތެރޭގައި ގިނައީ، އަންހެނުންނާއި ކުދަކުދިންނެވެ.