އިންޑިޔާ ސަރުކާރުން ޤާނޫނާ ޚިލާފަށް ‘އެކްސް’ގެ ކޮންޓެންޓް ސެންސަރ ކުރަމުންދާ ކަމަށް ބުނެ، އީލޮން މަސްކްގެ ސޯޝަލް މީޑިއާ ޕްލެޓްފޯމް 'އެކްސް' އިން އިންޑިޔާ ސަރުކާރުގެ މައްޗަށް ދައުވާ އުފުލައިފިއެވެ.

މާރިޗު 5 ގައި ކޯޓަށް ހުށަހެޅި މައްސަލާގައު، އިންޑިއާގެ އައިޓީ މިނިސްޓްރީން އެހެން ޑިޕާޓްމަންޓްތަކަށް ކޮންޓެންޓް ބްލޮކްކުރުމުގެ އަމުރު ނެރެފައިވާ ކަމަށެވެ.  އެ އަމުރުގައި، މިނިސްޓްރީ އޮފް ހޯމް އެފެއާޒުން ފާއިތުވި އަހަރު ތަޢާރަފުކުރި ސަރުކާރުގެ ވެބްސައިޓެއް ބޭނުންކުރުމަށް އެދިފައިވާ ކަމަށާ، ސޯޝަލް މީޑިއާ ކުންފުނިތަކަށްވެސް މި ވެބްސައިޓާ ގުޅުމަށް މަޖުބޫރުކުރަމުންދާ ކަމަށް އެކްސްއިން ބުނެފައިވެއެވެ.

އެކްސްއިން ބުނާ ގޮތުގައި މި ނިޒާމުގައި ކޮންޓެންޓް ނައްތާލުމަށް އިންޑިއާގެ ޤާނޫނުގައި ކަނޑައަޅާފައިވާ ހަރުކަށި ރައްކާތެރިކަމުގެ ފިޔަވަޅުތައް ނުހިމެނެއެވެ. އެގޮތުން ޤައުމުގެ ސިޔާދަތަށް ނުވަތަ އާންމު ނިޒާމަށް ގެއްލުން ލިބޭ ފަދަ ހާލަތްތަކުގައި މެނުވީ މިފަދަ އަމުރުތައް ނުނެރޭނެ ކަމަށާއި، އިސް އޮފިޝަލުންގެ ހަރުކަށި ބެލުމުގެ ދަށުން މެނުވީ މިފަދަ އަމުރުތައް ނުނެރޭނެ ކަމަށް ބަޔާންކޮށްފައިވާ ސަލާމަތީ ފިޔަވަޅުތައް މި ނިޒާމުގައު ނުހިމެނެއެވެ.

Advertisement

މި މައްސަލަ ދެކުނު އިންޑިއާގެ ކަރްނާޓަކަ ސްޓޭޓުގެ ހައި ކޯޓުގައި މި ހަފުތާގެ ކުރީކޮޅު އަޑުއެހުމެއް ބޭއްވުނު ނަމަވެސް، ވަކި ނިންމުމަކަށް އާދެވިފައެއް ނުވެއެވެ. މި މައްސަލައިގެ ދެން އޮންނަ އަޑުއެހުން އޮންނާނީ މާރިޗު 27 ގައެވެ.

2021 ވަނަ އަހަރު، އޭރު ޓްވިޓަރ ގެ ނަމުގައި އޮތް އެކްސްއާއި އިންޑިއާ ސަރުކާރާ ދެމެދު ހަމަނުޖެހުމެއް އުފެދުނެވެ. އެއީ ސަރުކާރުގެ ސިޔާސަތުތަކާ ދެކޮޅަށް ދަނޑުވެރިން ކުރި އިހުތިޖާޖާ ގުޅޭ ބައެއް ޓްވީޓްތައް ބްލޮކްކުރުމަށް ނެރުނު ޤާނޫނީ އަމުރުތަކާ އެކްސްއިން އެއްބާރުލުން ނުދިނުމާ ގުޅިގެންނެވެ.