ލޭ އަޅާކުދިންގެ އާއިލާތަކުން ކަންބޮޑުވުން ފާޅުކުރިތާ 24 ގަޑިއިރު ނުވަނީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ތެލެސީމިއާ ސެންޓަރަށް ވަޑައިގެން އެ ތަނުގެ ހާލަތު ބައްލަވައިލައްވައިފިއެވެ.
ރައީސް މުޢިއްޒު ސެންޓަރަށް ވަޑައިގެން ސެންޓަރުގެ ހުރިހާ ޑިޕާޓްމަންޓްތަކެއްގެ ހާލަތު ވަނީ ބައްލަވައިލައްވާފައެވެ.
ރައީސް އޮފީހުގެ އޮފިޝަލަކު މައުލޫމާތު ދިން ގޮތުގައި، މި ޒިޔާރަތުގައި ރައީސް ވަނީ، އެވަގުތު ޚިދުމަތް ހޯއްދަވަމުންދިޔަ ބަލިމީހުންގެ އާއިލާތަކާ ބައްދަލުކުރައްވައި، އެ ފަރާތްތަކުގެ ކަންބޮޑުވުންތަކަށް އަޑުއައްސަވާފައެވެ.
އަދި އާއިލާތަކުން ފާޅުކުރި ކަންބޮޑުވުންތަކަށް، މިވަގުތުން ފެށިގެން ހައްލު ކުރެވެން ހުރި ހުރިހާ ކަމެއް ހައްލު ކުރުމަށް، ކަމާބެހޭ އިދާރާތަކުގެ ވެރިންނާ މަޝްވަރާ ކުރައްވައިގެން ފިޔަވަޅުތައް އަޅަން ސަރުކާރުން ފައްޓަވާފައިވާ ކަމަށްވެސް ރައީސް އޮފީހުން މައުލޫމާތު ދެއެވެ.
ރައީސް ތެލަސީމިއާ ސެންޓަރަށް ވަޑައިގެން ހާލަތު ބެއްލެވުން-- ފޮޓޯ: ރައީސް އޮފީސް
ޒަމާނުއްސުރެ މި ސެންޓަރުގައި ހުރި މައްސަލަތައް ހައްލު ކުރުމަށް އެކަށީގެންވާ ފިޔަވަޅުތަކެއް އެޅިފައެއް ނެތެވެ. ނަމަވެސް މިހާރު ހުރި ހުރިހާ މައްސަލަތަކެއް ހައްލު ކުރެއްވުމުގެ މަސައްކަތް ފެށިފައިވާ ކަމަށް އެ އޮފީހުން ބުނެއެވެ.
ތެލެސީމިއާ ކުދިންނަށް ލޭ ލިބުމުގައި ދިމާވާ މައްސަލަތަކާއި ފިލްޓަރުތަކުގައި މައްސަލަތަކެއް ހުރި ކަމަށް ބުނެ އެ ކުދިންގެ އާއިލާތަކުން ރޭ މުޒާހަރާކޮށްފައިވެއެވެ. އެ މުޒާހަރާގައި ޢާއިލާތަކުން ވަނީ މި މައްސަލަތަކަށް އަވަސް ހައްލެއް ހޯދައިދިނުމަށް ގޮވާލާފައެވެ. އަދި ބްލަޑް ބޭންކުގެ ވެރިންގެ އިސްތިއުފާއަށްވެސް ވަނީ ގޮވާލާފައެވެ.
Advertisement
This content is created and paid for by advertisers and does not involve Voice Journalists
