ތެލެސީމިއާ ސެންޓަރުގެ ވަސީލަތްތައް އިތުރުކުރައްވާނެ ކަމަށާ އެކަންކަން ކުރިއަށް ގެންދަވާނީ ސީދާ އެމަނިކުފާނުގެ ބެލުމުގެ ދަށުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ތެލެސީމިއާ ސެންޓަރުގެ ހުރި މައްސަލަތައް ގާތުން ބައްލަވާލެއްވުމަށް ރައީސް މުޢިއްޒު ވަނީ މިއަދު އެ ސެންޓަރަށް ވަޑައިގެންފައެވެ.
އެއަށްފަހު ވާހަކަދައްކަވަމުން އެމަނިކުފާނު ވިދާޅުވީ، ތެލެސީމިއާ ސެންޓަރުގެ މައްސަލަތަކާއި ގުޅޭގޮތުން ވަރަށް ތަފްސީލީ މަޝްވަރާ ބައްދަލުވުމެއް މިއަދު ބާއްވާފައިވާ ކަމަށެވެ. އަދި އެ ބައްދަލުވުނުގައި މުހިންމު ގިނަކަންތައްތަކެއް ކުރިއަށް ގެންދާނެ ގޮތުގެ އިރުޝާދު އެމަނިކުފާނު ދެއްވާފައިވާނެ ކަމަށް ވެސް ވިދާޅުވުއެވެ.
އެތަން ހިންގަން ހިންގަން ޑިރެކްޓަރ ޖެނެރަލްއެއް ނުލައި 2017 ވަނަ އަހަރުން ފެށިގެން އަންނަ ކަމަށްވަނީ. އެކަން ވަގުތުން ހައްލު ކުރެވޭނެ ގޮތެއް އަޅުގަނޑުވާނީ ދަންނަވާފައި. ހަމައެއާއެކު ނަރުހުން މަދުވާހަކަ އާއި، ނަރުހުން ހޯދޭނެ ގޮތާއު، ސީނިއާ ފިޒިޝަނެއް ހަމަޖެއްސުމަށް، ތަނަށް ބޭނުންވާ އެކިކަހަލަ އާލާތްތައް ހޯދޭނެ ގޮތް. ލެބޯޓްރީއަށް ބޭނުންވާ ވަސީލަތްތައް، އެކި މުވައްޒަފުން، ލެބޯރަޓަރީ ޓެކްނޮލޮޖިސްޓުންނާއި، މިހެންގޮސް ބޭނުންވާ މުވަްްޒަފުން ހޯދުމަށާ، އަދި މަސައްކަތް ކުރާނެ ގަޑިވެސް، ހޮސްޕިޓަލެއްގަ މަސައްކަތް ކުރާ ގޮތަށް ގަޑިތައް އިތުރުކުރުމަށް ބޭނުންވާ ހިޔުމަންރިސޯސް އިތުރުކުރުމަށް. މިހުރިހާ ކަމެއް މިއަދު މަޝްވަރާކޮށް ކުރިއަށް ގެންދާނެ ގޮތް އަޅުގަނޑުވާނީ ދަންނަވާފައި،
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
މިއާއެކު ރައީސް ވިދާޅުވީ، މި މަޝްވަރާ ބައްދަލުވުމުގައި ފިނޭންސް މިނިސްޓަރވެސް ބައިވެރިވެވަޑައިގެންނެވި ކަމަށާ، ސެންޓަރުގެ ކަންކަމަށް ބޭނުންވާ ފައިސާ ހަމަޖެއްސުމުގައި އެއްވެސް ދަތިކަމެއް ނޫނީ ހުރަހެއް ނެތް ކަން ޔަގީން ކުރުމަށް މިނިސްޓަރަށް ދެންނެވިކަމަށެވެ. އަދި ސެންޓަރުގެ ކަންކަން ކުރިއަށް ގެންދަވާނެ މުހުލަތުތަކެއްވެސް ދެއްވާފައިވާނެ ކަމަށް ވިދާޅުވުއެވެ.
”ކުރިއަށް އޮތް ދުވަސްތަކުގައި ތެލެސީމިއާ ކަންތަކުގައި މި ދިމާވާ ހުރިހާ ކަމެއްގައި ރަނގަޅު ހައްލުތަކެއް ގެނެސްދޭނަން. ފައިސާގެ ގޮތުން ދަތިތަކެއް ވެގެން ކަމެއް ހައްލުނުވެ ނޯންނާނެކަން އަޅުގަނޑު ސީދާ ޔަގީންކުރާނަން. އެކަން އަޅުގަނޑުވާނީ ޔަގީންކޮށްފައި. ތެލެސީމިއާ ކުދިންނަށް ދިމާވާ ކަންކަން ހައްލުކުރުމުގައި ސީދާ އަޅުގަނޑުގެ ބެލުމުގެ ދަށުންމިކަންކަން ކުރިއަށް ގެންދާނަން.”
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
މީގެ އިތުރުން، މިސަރުކާރުން ހުޅުމާލޭގައި އަޅާ ތެލެސީމިއާ ސެންޓަރާއެކު ތެލެސީމިއާ ކުދިންނަށް ގިނަ ޚިދުމަތްތަކެއް ލިބިގެންދާނެކަންވެސް އެމަނިކުފާނު ފާހަގަކުރެއްވިއެވެ.
ތެލެސީމިއާ ހޮސްޕިޓަލް އެޅުމަށް ހުޅުމާލެ ދެވަނަ ފިޔަވަހިން 72،000 އަކަފޫޓުގެ ބިމެއް ސަރުކާރުން ވަނީ ހަމަޖައްސަވާފައެވެ.
ހުޅުމާލެގައި ތަރައްޤީކުރާ މި ހޮސްޕިޓަލަކީ އެންމެ ޒަމާނީ ވަސީލަތްތަކާއެކު ތެލަސީމިއާ ކުދިންނަށް ބޭނުންވާ ފަރުވާތައް ދެވޭގޮތަށް، ލެބޯޓްރީއާއި ވޯޑްތަކުގެ އިތުރުން ޕްރައިވެޓް ރޫމްތަކާއި އައިސީޔޫ އަދި އެކަހެރިކޮށްގެން ފަރުވާދެވޭނެ އިންތިޒާމާއި، ގުނަވަން ބަދަލުކުރުމާއި ބޯންމެރޯއަށް ޓްރާންސްޕްލާން ޔުނިޓެއްވެސް ހިމެނޭގޮތަށް ފަރުމާކޮށްފައިވާ ހޮސްޕިޓަލެކެވެ. މީގެ އިތުރުން ޖެނެޓިކް ސްކްރީނިންގ، ކައުންސެލިން ޚިދުމަތްވެސް މި ހޮސްޕިޓަލް ތަރައްޤީ ކުރެވޭއިރު ލިބިގެންދާނެއެވެ.
ތެލެސީމިއާ ކުދިންނަށް ފަރުވާދޭނެ ޚާއްސަ ހޮސްޕިޓަލެއް މިދައުރުގެ ތެރޭގައި ޤާއިމް ކުރުމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒުގެ ގެ ވަޢުދެކެވެ.
Advertisement
This content is created and paid for by advertisers and does not involve Voice Journalists
