މި އަހަރު ހައްޖަށް ދެވޭނެ ކަމަށް ކަނޑައަޅާ ޙައްޖު ކޯޕަރޭޝަންގެ ކިއުގައި ތިބި އެންމެނަށް ޙައްޖުގެ އަޅުކަމަށް ދިއުމުގެ ފުރުސަތު ލިބޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެކްސް ގައި މިރޭ ކުރެއްވި ޕޯސްޓެއްގަ އެވެ.

ކޮންމެ އަހަރު ވެސް ޙައްޖަށް ދެވޭނެ މީހުންގެ ލިސްޓެއް ކޯޕަރޭޝަނުން ތައްޔާރު ކުރެ އެވެ. ނަމަވެސް އެކި ސަބަބުތަކާއި ގުޅިގެން ލިސްޓްގައި ހިމެނޭ އެންމެނަށް ޙައްޖަށް ދިއުމުގެ ފުރުސަތެއްް ނުލިބެ އެވެ.

Advertisement

ރައީސް ވިދާޅުވީ މި އަހަރު ހައްޖަށް ދެވޭނެ ކަމަށް ކަނޑައަޅާ ޙައްޖު ކޯޕަރޭޝަންގެ ކިއުގައި ތިބި އެންމެނަށް ޙައްޖުގެ އަޅުކަމަށް ދިއުމުގެ ފުރުސަތު ލިބޭނެ ކަމަށެވެ. އަދި އެމަނިކުފާނު ވަނީ މިއީ ޒަމާންތަކަކަށް ފަހު, އެއަހަރެއްގައި ކިއުގައި ޖެހިފައިތިބި އެންމެނަށް އެއަހަރު ހައްޖަށް ދެވޭ ފުރަތަމަ ފަހަރުކަން ފާހަގަކުރައްވާފަ އެވެ.

ޙައްޖު ކިއު ކުޑަކޮށް ޙައްޖަށް ދިވެހީން ގެންދިއުމުގެ ކަންކަން ހަރުދަނާ ކުރެއްވުމަށް ރައީސުލްޖުމްހޫރިއްޔާގެ އިސްނެންގެވުމުގެ މަތީން އިސްލާމިކް މިނިސްޓްރީއާ ޙައްޖު ކޯޕަރޭޝަނުން ދަނީ ގިނަ މަސައްކަތްތަކެއް ކުރަމުންނެވެ. އެ ގޮތުން ޙައްޖަށް ދާން ކުރަން ޖެހޭ ޚަރަދު ކުޑަކުރުން ހިމެނެ އެވެ.

އަދި ޙައްޖުގެ އިންތިޒާމުތައް ހަރުދަނާކޮށް ދިވެއްސަކަށް އެއްވެސް މާލީ ގެއްލުމެއް ލިބުމުގެ ފުރުސަތު ނުދިނުމަށް ޙައްޖަށް މީހުން ގެންދިއުން ކޯޕަރޭޝަންގެ ދަށަށް ވަނީ ބަދަލުކޮށްފަ އެވެ.

މީގެ އިތުރުން ޙައްޖަށް ދެވޭނެ ފަދަ ނެތް ފަޤީރުން ޙައްޖަށް ފޮނުވުމުގެ މަސައްކަތް ވެސް ވަނީ ފަށާފަ އެވެ. މިދިޔަ އަހަރު 50 މީހުން ފޮނުވި އެވެ. އަދި މި އަހަރު ވެސް ޙައްޖަށް ދާނެ 50 ފަގީރުން ވަނީ ކަނޑައަޅާފަ އެވެ.