ހއ. އަތޮޅަށް ބީއެމްއެލްގެ ގެސްޓު ހައުސް ފައިނޭންސިންގ ތަޢާރަފްކޮށްފިއެވެ.

އެ އަތޮޅަށް މި ސްކީމް ތަޢާރަފްކޮށްފައިވަނީ އިއްޔެ ހއ. ފިއްލަދޫގައި ބޭއްވި ހާއްސަ ރަސްމިއްޔާތެއްގައެވެ.

އިއްޔެގެ ރަސްމިއްޔާތުގައި ވާހަކަދައްކަވަމުން ބޭންކް އޮފް މޯލްޑިވްސް، ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ ގެސްޓު ހައުސް ފައިނޭންސިންގއަކީ މިހާރުވެސް އެބޭންކުން ފޯރުކޮށްދެމުންދާ ޚިދުމަތެއް ކަމަށެޗެ. ނަމަވެސް  ހއ. އަތޮޅަށް ތަޢާރަފްކޮށްފައިވަނީ ހެޔޮ ބަދަލުތަކާއެކު އެ އަތޮޅުގައި ފަތުރުވެރިކަން ތަރައްގީކުރުމަށް ތައްޔާރުކޮށްފައިވާ ފައިނޭންސިންގ އެކެވެ.

Advertisement

ގެސްޓުހައުސް ފިނޭންސިންގ އާއެކު، ރަށުގައި ގެސްޓްހައުސް ތަރައްގީކުރަން ބޭނުން ފަރާތްތަކަށް އެ ފުރުސަތު ފަހިވެގެންދާނެ ކަމަށެވެ. އެގޮތުން ގެސްޓުހައުސް ވުޔަފާއި އަލަށް ފަށަން ބޭނުންވާ ފަރާތްތަކާއި އެ ވިޔަފާރި ފުޅާކުރަން ބޭނުންވާ ފަރާތްތަކަށްވެސް ފުރުސަތު ފަހިވެގެންދާނެ ކަމަށް ޝަރީފް ވިދާޅުވުއެވެ.

މީގެ ކުރިން ގެސްޓްހައުސް އަޅަން ބޭނުން ނަމަވެސް ބޭންކުން އިތުރު ސެކިޔުރުޓީއެއް އެފަރާތް އަތުން ނަގައެވެ. އެހެން ނަމަވެސް މިހާރު އެ ސެކިޔުރިޓީ ނުނަގާނެ ކަމަށް ޝަރީފް ވިދާޅުވުއެވެ. 

”ފައިނޭންސިންގ ގައި ބޭންކުން އިތުރު ސެކިޔުރިޓީއެއް ބޭނުމެއް ނުވާނެ. މާނައަކީ ގެސްޓުހައުސް އަޅާ އިމާރާތް މޯގޭޖް ކޮށްގެން އިތުރު އެހެން ސެކިއުރިޓީއެއް ނުކާ މިހާރު ގެސްޓްހައުސް އަށް ލިބޭނެ،" ޝަރީފް ވިދާޅުވިއެވެ. 

ޝަރީފް ވިދާޅުވީ މި ފައިނޭންސިންގއާ ގުޅޭ މައުލޫމާތު އެ އަތޮޅުގެ ރައްޔިތުންނަށް ދިނުމަށްޓަކައި ބޭންކުގެ ފަރާތުން ޓީމުތައް ރަށްރަށަށް ޒިޔާރަތްކުރާނެ ކަމަށެވެ.

ޝަރީފް އިތުރަށް ވިދާޅުވީ ރާއްޖޭގެ ފަތުރުވެރިކަމުގެ ސިނާއަތް ކުރިއެރުވުމަށް އެ ބޭންކުން ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ދެމެހެއްޓެނިވި ތަރައްޤީ އާއި ތިމާވެއްޓާއި ގުޅުން ހުރި މަސައްކަތްތަކަށް ފައިނޭންސް ދޫކުރަމުންދާ ފާހަގަކުރެއްވިއެވެ. 

"5 އަހަރު ތެރޭ 400 މިލިޔަން ޑޮލަރަށްވުރެ ބޮޑު އަދަދެއް ފައިނޭންސްކޮށްދެވިފައިވާނެ، ރިސޯޓު ތަރައްޤީއަށް، މިކަމުންވެސް ދައްކައިދެނީ ފަތުރުވެރިކަން ކުރިއެރުވުމަށް ބޭންކުންދޭ އަހައްމިއްޔަތުކަން،" ޝަރީފް ވިދާޅުވިއެވެ.