މާދަމާއިން ފެށިގެން އީދު ދުވަހާ ހަމައަށް ސަލްޓަން ޕާކު ބަންދުވާނެ ކަމަށް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓްރީ އިން ބުނެފިއެވެ.

އެ މިނިސްޓްރީ އިއްޔެ ކުރި އިއުލާނެއްގައި ބުނެފައިވާގޮތުން ވަގުތީ ގޮތުން ސަންޓަންޕާކު ބަންދުކުރުމަށް ނިންމާފައިވަނީ އީދު ހަވީރަށް ވާން ޖެހޭ ތައްޔާރީތައްވުމަށްޓަކައި ކަމަށެވެ.

ދިފާޢީ ވުޒާރާއިން ސަރުކާރުގެ އެކި ކުންފުނިތަކާއި ކުޅިވަރާއި ބެހޭ ވުޒާރާއާއި، ޤައުމީ ދިފާޢީ ބާރާއި، ދިވެހި ފުލުހުންގެ ޚިދުމަތާއި ގުޅިގެން ކުރިއަށްގެންދާ ޢީދު ހަވީރު ބޭއްވުމަށް ހަމަޖެހިފައިވަނީ ޢީދު ދުވަހުގެ ހަވީރު 4 އިން 6 އަކަށެވެ.

Advertisement

އީދު ހަވީރަކީ ފިތުރު އީދުގެ މުނާސަބަތުގައި އެކަމުގެ އުފަލުގައި އާއިލާތައް އެކުވެރި މާހައުލެއްގައި ބައްދަލުވެ އީދު ސަލާންކޮށް ހިތްހަމަޖެހޭ މާހައުލެއްގައި ވަގުތު ހޭދަކުރުމުގެ ގޮތުން ކުރިއަށްގެންދާ ހަރަކާތެކެވެ.

މި ހަރަކާތް އޮންނާނީ މާލެ ސަލްޓަންޕާކުން ފެށިގެން އިސްލާމީ މަރުކަޒު މައިދާނާއި ޖުމްހޫރީ މައިދާނާ އަދި ރަސްމީ ބޮޑު ފާލަމުގެ ސަރަހައްދު ހިމެނޭހެން އެކަމަށް ތައްޔާރުކުރެވިފައިވާ ބޮޑު ސަރަހައްދެއްގައެވެ.