އަންނަ އަހަރުން ފެށިގެން މުޅި ރަމަޟާން މަސް އެއްކޮށް ދަރިވަރުންނަށް ބަންދު ކުރުމަށް އެޑިޔުކޭޝަން މިނިސްޓަރ އަށް ދަންނަވާފައިވާނެ ކަމަށް ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.
"ރައްޔިތުންނާ އެކު" މި ނަމުގައި ރައީސުލްޖުމްހުރިއްޔާގެ އޮފީހުން ކުރިއަށްގެންދިޔަ ޕޮޑްކާސްޓްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ވިދާޅުވީ، މިއަހަރު އެކަޑެމިކް ކަލެންޑަރުގައި ހަމަޖެއްސުމަށް ކުރިން އޮތީ މިއަހަރުގެ ރަމަޟާން މަހުގެ އެއް ހަފުތާ ފިޔަވައި މުޅި ރަމަޟާން މަސް ބަންދުކުރާ ގޮތަށްކަމުގައެވެ.
އެހެންނަމަވެސް ފަހުން އެކި ކަންކަން ހަމަޖެއްސުމަށްފަހު މުޅި ރަމަޟާން މަސް ބަންދުކުރައްވާގޮތަށް ކަންކަން ހަމަޖެއްސެވުމުން ގިނަ ބެލެނިވެރިންގެ ފަރާތުން އެކަމަށް އެދެވޭ، ރަނގަޅު ހިޔާލު ތަކެއް ލިބިވަޑައިގެންނެވިކަން އެމަނިކުފާނު ފާހަގަކުރެއްވިއެވެ.
”އަޅުގަނޑުވާނީ މިހާރު އެޑިޔުކޭޝަން މިނިސްޓަރ އަށް ދަންނަވާފައި، ބައްލަވައި ދެއްވާށޭ ދެން އޮތް ކޮންމެ އަހަރެއްގައިވެސް، މުޅި ރަމަޟާން މަސް ބަންދު ގޮތަށް ހަމަޖެއްސޭތޯ. އެއްވެސް ވަރަކަށް ކިޔަވައިދޭ ދުވަސްތައް ނޫނީ ގަޑިތައް ނުގެއްލޭނެހެން. “
ރައީސް ޑރ މުޙައްމަދު މުޢިއްޒު
ރައީސުލްޖުމްހޫރިއްޔާ ވިދާޅުވީ ރަމަޟާން މަސް ސްކޫލްތައް އެއްކޮށް ބަންދުކުރުމުން ދަރިވަރުންނާ ބެލެނިވެރިންވެސް އަޅުކަމުގައި ވަގުތު ހޭދަކުރުމަށް މަގުފަހިވެގެންދާނެކަމުގައެވެ.
މީގެ އިތުރުން، އެމަނިކުފާނު ވަނީ، ރަމަޟާން މަހުގެ ފަހުދިހައެއް ސަރުކާރު ބަންދު ދުވަސްތަކެއް ކަމުގައި ކަނޑައެޅުމުން ފަހު ދިހައިގެ ބޭނުން ހެޔޮ ގޮތުގައި ހިފުމުގެ ފުރުސަތު ދިވެހިންނަށް ލިބިގެން ގޮސްފައިވާކަން ފާހަގަކުރައްވާފައެވެ. އެގޮތުން، ދުވާލު އޮފީހަށް ދާން ނުޖެހުމަކީ، ރޭ އަޅުކަމުގައި މިސްކިތުގައި ގިނަ ވަގުތުތައް ހޭދަކުރުމަށް ލިބިގެންދިޔަ ފަހި ފުރުސަތެއްކަން ފާހަގަކުރެއްވިއެވެ.
ހަމައެހެންމެ، މުސްލިމުން އުފާފާޅުކުރުމަށް އޮންނަ ހަމައެކަނި ދެ މުނާސަބަތަކީ ދެޢީދު ކަމަށްވުމުން، އެ ދެޢީދުގައި އުފާ ފާޅުކުރުމަށް މަގުފަހިކުރަން ސަރުކާރުން ޖެހޭނެކަން އެމަނިކުފާނު ފާހަގަކުރެއްވިއެވެ. އަދި އެކަމަށްޓަކައި ސަރުކާރުން ކުރަމުންދާ ކަންކަމަށް ވެސް އަލިއަޅުވާލެއްވިއެވެ.
Advertisement
This content is created and paid for by advertisers and does not involve Voice Journalists
