ދުންފަތުގެ އިސްތިޢުމާލު ކުރުމަށް އަލަށް ފަށައިގަންނަ ޒުވާނުން، އެކަމުން ދުރުކުރުމަށް ފިޔަވަޅުތަކެއް އަޅަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިހެން ވިދާޅުވީ “ރައްޔިތުންނާ އެކު” މިނަމުގައި ކުރިއަށްގެންދިޔަ ޕޮޑްކާސްޓްގައި ވާހަކަފުޅު ދައްކަވަމުންނެވެ.

އެ ޕޮޑްކާސްޓްގައި ވާހަކަދައްކަވަމުން، ރައީސް ވިދާޅުވީ، ދުންފަތުގެ ބާވަތްތަކުގެ އަގުތައް ސަރުކާރުން ބޮޑު ކުރީ ބަޔަކަށް އުނދަގޫކޮށް ދަތިތަކެއް ކުރިމަތި ކުރުވާން ނޫން ކަމަށެވެ. އެހެނެއްކަމަކު އެކަން ކުރެއްވީ ވަރަށް މާތް މަޤުސަދެއްގައި ކަމަށެވެ. 

Advertisement

އެގޮތުން އެމަނިކުފާނު ވިދާޅުވީ، ދުންފަތުގެ އިސްތިއުމާލު ކުރުމަކީ ދިވެހިންގެވެސް ވަރަށް ބޮޑަށް ކަށީގައި ހިފާފައިވާ ކަމެއް ކަމުން، އެކަމުން ދުރުހެލި ކުރުވުމަށް ސިނގިރޭޓްގެ ޑިޔުޓީ ބޮޑުކުރެއްވީ ކަމަށެވެ. އަދި ވޭޕްވެސް އެއްކޮށް މަނާކުރެއްވީ، ދިވެހިންގެ ސިއްޙީ ޙާލަތު ރަނގަޅުކޮށް، ރާއްޖޭގެ އާއްމު ސިއްހަތުގެ ރަނގަޅު ކުރެއްވުމަށް ކަމަށް އެމަނިކުފާނު ވިދާޅުވިއެވެ. 

މިއާއެކު އެމަނިކުފާނު ވަނީ، ދުންފަތުން ދިވެހިން ދުރުކުރުމަށް ސަރުކާރުން ދެން އަޅަން ނިންމާފައިވާ ފިޔަވަޅުގެވެސް ކުޑަ އިޝާރާތެއް ދެއްވާފައެވެ.

ރައީސް ވިދާޅުވީ، ދުނިޔޭގެ އެހެން ބައެއް ގައުމުތަކުގައި އެފަދަ ފިޔަވަޅުތައް އަޅާފައިވާ ކަމަށާ، އެގޮތުން ރާއްޖޭގައި އަޅުއްވާނެ ފިޔަވަޅު ތަކުގެ ތަފްސީލް ފަހުން އިއުލާން ކުރައްވާނެ ކަމަށެވެ.