ހއ. ކެލާގެ ރަށްވެހި އާސާރު ތަރައްޤީކުރުމުގެ މަސައްކަތް ސަރުކާރުން ރޯޑް ޑިވެލޮޕްމަންޓް ކޯޕަރޭޝަނާ ހަވާލުކޮށްފިއެވެ.

މިކަމަށްޓަކައި އިއްޔެ ދިވެހިބަހާއި ސަގާފަތާއި ތަރިކައާ ބެހޭ ވުޒާރާ އިން ވަނީ އާރުޑީސީއާއެކު އެއްބަސްވުމުގައި ސޮއިކޮށްފައެވެ. ދިވެހިބަހާ ސަގާފަތާ ތަރިކައާ ބެހޭ ވުޒާރާގެ ފަރާތުން އެއްބަސްވުމުގައި ސޮއިކުރެއްވީ، މިނިސްޓަރު އާދަން ނަސީރުއެވެ. އާރުޑިސީގެ ފަރާތުން އެއްބަސްވުމުގައި ސޮއިކުރެއްވީ، މެނޭޖިންގ ޑިރެކްޓަރު، ބްރިގޭޑިއާ ޖެނެރަލް ރިޓަޔަޑް އަލީ ޒުހައިރު އެވެ.

މި މަޝްރޫޢުއަކީ ތަރިކައިން ނަފާ ހޯދުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގެންގުޅުއްވާ ސިޔާސަތުގެ ތެރޭގައި ހިމެނިގެން ކުރިއަށްދާ މަޝްރޫޢުއެކެވެ. ކުރިން ތަރިކަ ރައްކާތެރިކުރުމުގެ ދާއިރާއަކީ ހަރަދުތަކެއް ކުރެވި އާމްދަނީއެއް ނުލިބޭ ދާއިރާއެކެވެ. ނަމަވެސް މިހާރު އެކަން ބަދަލުކުރުމަށް މަސައްކަތް ކުރަމުންދާ ކަމަށް ވަޒީރު އާދަން ނަސީރު ވަނީ ވިދާޅުވެފައެވެ.

އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ، މިއީ ރާއްޖޭގައި އަދި މުޅިން އަލަށް ހިންގޭ މަޝްރޫޢުއެއް ކަމަށާއި، މިކަމުގެ ތެރޭގައިދިވެހިންގެ ތަރިކައާއި، ޒަމާނީ ޓެކްނޮލޮޖީގެ އިތުރުން އިޤުތިޞާދީ އަދި އިއާދަކުރުމުގެ ބައެއް ހިމެނޭކަމަށެވެ. މި މަސައްކަތުގެ ތެރެއިން މި މަޝްރޫޢުގެ ކޮންސެޕްޓް ޑިޒައިން ކުރުމުގެ މަސައްކަތްވެސް ކުރިއަށްދާކަމަށް ވަޒީރު ވިދާޅުވިއެވެ.

ކެލާގެ އިތުރުން މި މަޝްރޫޢުގެ ތެރޭގައި ހިމެނިގެން ގިނަ ޕްރޮޖެކްޓްތަކެއް ކުރިއަށްގެންދިއުމަށް މިނިސްޓްރީން ވަނީ ނިންމާފައެވެ. މީގެ ތެރޭގައި ނ. ލަންދޫ މާ ބަދިގެ ސަރަހައްދުގައި ސައިޓް މިއުޒިއަމެއް ތަރައްޤީކުރުމާއި، ތ. ދިޔަމިގިލި ގަނޑުވަރު ސައިޓް މިއުޒިއަމެއްގެ ގޮތުގައި ތަރައްޤީކުރުން ހިމެނެއެވެ.