ސްޑޫޓެންޑް ލޯނުތައް އިސްލާމީ ހަމަތަކަަށް ފައްތާ ލޯނަށް ދޫކުރާ ފައިސާގެ އިތުރަށް އެއްވެސް އަދަދެއް ނުނަގަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި ނިންމެވުމަށް ބައެއް ދީނީ އިލްމުވެރީން ތައުރީފު ކުރައްވައިފި އެވެ.

ރައީސްގެ ނިންމެވުމާއި ގުޅިގެން އިސްލާމިކް ޔުނިވާސިޓީގެ ވައިސް ޗާންސެލާ ޑރ. އަލީ ޒާހިރު ބިން ސައީދު ގާސިމް ވިދާޅުވީ ‏ރިބާ ހިމެނޭގޮތަށް ކުރިން ދޫކުރަމުން އައި ސްޓޫޑެންޓް ލޯނު، އިސްލާމީ ޝަރީޢާ ހުއްދަ ކުރާ ގޮތަށް ބަދަލު ކުރަން ނިންމެވި ކަމަށްޓަކައި ރައީސުލް ޖުމްހޫރިއްޔާ‬⁩ އަށް އިޚްލާސްތެރިކަމާއެކު ޝުކުރު ދަންނަވާ ކަމަށެވެ.

އަދި ވިދާޅުވީ މިފަދަ ކަންކަމަކީ ދީނަށް ލޯބިކުރާ ކޮންމެ މީހަކު އުފާވާނެ ކަންކަން ކަމަށެވެ.

ޖަމިއްޔަތުއްސަލަފުގެ ނާއިބު ރައީސް އަދި އިލްމުވެރީންގެ މަޖިލީހުގެ ރައީސް އައްޝައިހް އަހްމަދު ސަމީރު ވެސް ވަނީ ރައީސްގެ ނިންމެވުމަށް ޝުކުރު އަދާކުރައްވާފަ އެވެ.

ވިދާޅުވީ އިސްލާމީޝަރީޢާ ހުއްދަ ކުރާ އުޞޫލުން ސްޓޫޑެންޓް ލޯނުގެ ކަންކަން ތަރުތީބުކޮށްދެއްވަން ނިންމެވިކަމަށްޓަކައި ރައީސް މުއިއްޒަށް ޝުކުރު ދަންނަވާ ކަމަށެވެ. އަދި ވިދާޅުވީ މީ އިސްލާމީ އުޞޫލަށް ކަންކަން ބައްޓަން ކުރެއްވުމުގައި ރައީސުލް ޖުމުހޫރިއްޔާ އެޅުއްވި ވަރަށް ހެޔޮ ފިޔަވަޅެއް ކަމަށެވެ.

އިސްލާމީ މަރުކަޒުގެ އިސް އިމާމު އައްޝައިހް މުހައްމަދު ލަތީފް ވަނީ ސްޑޫޓެންޑް ލޯނުތައް އިސްލާމީ ހަމަތަކަަށް ފެތޭ ލޯނަކަށް ބަދަލު ކުރެއްވުމަށް ނިންމެވި ހަބަރަކީ ވަރަށް އުފާވެރި ހަބަރެއް ކަމަަށް ވިދާޅުވެފަ އެވެ.

އަދި ރައީސްގެ އިސްލާހީ މަސައްކަތްޕުޅުގައި ބަރަކާތް ލެއްވުން އެދި ދުއާ ކުރެއްވި އެވެ.

މީގެ އިތުރުން ވެސް ބައެއް އިލްމުވެރީން ވަނީ ރައީސްގެ މި ނިންމެވުމަށް ތައުރީފު ކުރައްވާފަ އެވެ.

‏ރައީސް ރޭ ވިދާޅުވީ ރާއްޖެއާއި ރާއްޖެއިން ބޭރުގައި މަތީ ތަޢުލީމާއި ތަމްރީން ހޯދަން ދޫކުރާ އަދި ދޫ ކޮށްފައިވާ ލޯނު ތަކަކީ އިސްލާމީ ހަމަތަކަށް ފެތޭ "ޝަރީޢާ ކޮމްޕްލަޔަންޓް" ލޯނުތަކަކަށް ހެދުމަށް ބައެއް ކަންކަން ތަންފީޒު ކުރުމަށް ކަމާބެހޭ ފަރާތްތަކަށް އިއްޔެ ދަންނަވާފައިވާ ކަމަށެވެ.

އެގޮތުން އެއް ކަމަކީ ރާއްޖެއާއި ރާއްޖެއިން ބޭރުން މަތީ ތަޢުލީމާއި ތަމްރީނު ހޯދަން ދޫކުރާ ލޯނު ޝަރީޢާ ކޮމްޕްލަޔަންޓް ކުރުމެވެ.

‏އަދި ރާއްޖެއާ ރާއްޖޭން ބޭރުން ތަޢުލީމާ ތަމްރީނު ހޯދުމަށް މިނިސްޓްރީ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓުން ދޫކުރާ ލޯނު ޝަރީއާ ކޮމްޕްލަޔަންޓް ލޯނެއްގެ ގޮތުގައި ހަމަޖެއްސުމުގެ ގޮތުން ލޯނާއެކު ހިމެނިފައިވާ %1 އެޑްމިނިސްޓްރޭޓިވް ފީ ގެ ގޮތުގައި ނަގަމުންދާ އަދަދު އެއްކޮށް އުނިކުރުމަށް ވެސް ވަނީ އަންގާފަ އެވެ.

އެމަނިކުފާނު ވަނީ ލޯނުގެ ގޮތުގައި ދޫކުރާ ފައިސާގެ އިތުރުން އެއްވެސް މިންވަރެއް އިތުރަށް ޗާޖް ނުކުރުން ދަންނަވާފަ އެވެ.

‏މީގެ އިތުރުން ކުރިން ލޯނު ނަގައިފައިވާ ފަރާތްތަކުން ދައްކަން ހުންނަ ފައިސާއިންވެސް، އެޑްމިނިސްޓްރޭޓިވް ފީ އުނިކޮށް އެދަރިވަރުންގެ ލޯނު އަދަދުތައް އަލުން އެޖަސްޓްކުރަން ވެސް ވަނީ އަންގަވާފަ އެވެ.

‏

‏

‏

‏