ތިލަދުންމަތީ އުތުރުބުރީ ކެލާގެ ފަޅުގައި ދެ ރިޒޯޓު ތަރައްގީ ކުރުމަށްޓަކައި އެ ރަށުގެ އިހުތިސާސަށް ބަދަލު ގެންނަވައިފި އެވެ.

ކެލާ އިހްތިސާސަށް ބަދަލު ގެންނަވާ ރައީސުލްޖުމްހޫރިއްޔާގެ ގަރާރު މިހާރު ވަނީ ގެޒެޓް ކުރައްވާފަ އެވެ. ކެލާ ފަޅުގައި ދެ ރިސޯޓް ތަރައްގީ ކުރުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. އަދި އެއީ ކެލާގެ ރައްޔިތުންގެ ޒަމާންވީ ހުވަފެނެކެވެ.

ރައީސުލްޖުމްހޫރިއްޔާގެ އޮފީހުން ބުނީ ރައީސުލްޖުމްހޫރިއްޔާގެ ރިޔާސީ ވައުދުފުޅާ އެއްގޮތަށް، ތިލަދުންމަތީ އުތުރުބުރީ ކެލާގެ ފަޅުގައި ދެ ރިޒޯޓު ތަރައްގީ ކުރުމަށްޓަކައި އިހްތިސާސަށް ބަދަލު ގެންނަވާފައިވާ ކަމަށެވެ. އެ ގޮތުން އެ ރަށުގެ ފަޅުތެރެއިން ޖުމުލަ 325.5 ހެކްޓަރު ކަނޑައެޅުމަށް އެމަނިކުފާނު ވަނީ ނިންމަވާފަ އެވެ.

އެ މަނިކުފާނު މިގޮތަށް ނިންމަވާފައިވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ގާނޫނުން ދިވެހިރާއްޖޭގެ އެންމެހައި އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިހްތިސާސް ކަނޑައެޅުމަށް ރައީސުލްޖުމްހޫރިއްޔާއަށް މަތިކޮށްފައިވާ މަސްއޫލިއްޔަތުގެ ދަށުން، އެ މަނިކުފާނު މިއަދު ނެރުއްވި ގަރާރުންނެވެ.

ކެލާ އިހްތިސާސަށް ގެންނެވި ބަދަލު އަންގައިދޭ ޗާޓް

ތިލަދުންމަތީ އުތުރުބުރީ ކެލާގެ އިހްތިސާސަށް ގެނައި ބަދަލު ދައްކުވައިދޭ ޗާޓު ޖަދުވަލުކޮށް، މި ގަރާރު މިހާރު ވަނީ ދިވެހި ސަރުކާރުގެ ގެޒެޓުގައި ޝާއިއު ކުރައްވާފައެވެ.

ފެބްރުއަރީ 25, 2024 ގައި ކެލާއަށް ވަޑައިގެން ރައީސް ވަނީ އެ ވައުދު އާކުރައްވާފަ އެވެ. އެމަނިކުފާނު އެ ދުވަހު ވިދާޅުވީ އެ މަޝްރޫއު ކުރިއަށް ގެންދަވާނެ ކަމަށެވެ. އަދި އެއީ ކެލެއާ ކައިރި ރަށްރަށުގެ ރައްޔިތުންގެ ފައިދާއާ މަންފާއަށްޓަކައި މުހިންމު މަޝްރޫއު އެއް ކަމަށެވެ.