މެދުއިރުމަތީ މައްސަލަ ހޫނުވެ އެންމެފަހުން އީރާނާއި އެމެރިކާ އާ ދެމެދު ހަނގުރާމައެއް ފެށުމުގެ ބިރު ބޮޑުވެދާނޭކަމަށް މެދުއިރުމަތީގެ ބައެއް ހަބަރުފަތުރާ ވަސީލްތަތްތަކުން ބުނަން ފަށައިފިއެވެ. ބައެއް ނޫސްތަކުން މި ބީދައިން ރިޕޯޓްކުރަް ފަށާފައިވަނީ އީރާނުގެ ނިއުކްލިއާ މަޝްރޫޢުއާ ބެހޭގޮތުން އެމެރިކާއިން އެދުނު އެދުމަށް އީރާނުން ބީރުކަންފަތެއް ދިނުމުންނެވެ. އެމެރިކާއިން ވަނީ އީރާނުން ކުރިއަށްގެންދާ އެ މަޝްރޫޢުގެ މަސައްކަތްތައް ހުއްޓާލުމަށް އިންޒާރުދީފައެވެ. އަދި އެކަމާ ގުޅޭގޮތުން ވާހަކަތައް ފެށުމަށް ވަނީ އަންގާފައެވެ.

މިކަމާ ގުޅޭގޮތުން އީރާނުންވަނީ އެޤައުމުން ދެކޭގޮތުގެ ރަޢުޔު އެމެރިކާގެ ރައީސް ޑޮނާލްޑް ޓްރަމްޕަށް ސިޓީއަކުންވެސް ފޮނުވާފައެވެ. އެމެރިކާ އާއި އީރާނުގެ ގުޅުން މިހާރު ގޯސްވެގެން އުޅެނީ އީރާނުގެ ރައީސް މައްސޫދު ޕެޒޭޝިއަން އެމެރިކާއަށް ނިސްބަތްކުރައްވައި ދެއްކެވި ވާހަކަފުޅާ ގުޅިގެންނެވެ.

އީރާނުގެ ވެރިރަށް ތެހެރާނުގައި އާދިއްތަދުވަހު ބޭއްވި ކެބިނެޓް ބައްދަލުވުމުގައި ރައީސް މައްސޫދު ޕެޒޭޝިއަން ވަނީ، އެޤައުމުން ދެން އެމެރިކާ އާއެކު ދައްކާނެ ވާހަކަތަކެއް ނެތްކަމަށް ވިދާޅުވެފައެވެ. ހާއްސަ ގޮތެއްގައި މިހާރު އުފެދިފައިވާ ނިއުކްލިއާ މަޝްރޫޢުގެ ހިޔާލުތަފާތުވުންތަކާ ގުޅޭގޮތުން ދެން މީގެފަހުން އީރާނުން އެމެރިކާ އާ އެއްވެސް މުއާމަލާތެއް ނުކުރާނޭކަމަށް އޭނާ ވަނީ ވިދާޅުވެފައެވެ. ނަމަވެސް ޤަތަރު މެދުވެރިކޮށް ނުސީދާކޮށް ވާހަކަތައް ކުރިއަށްގެންދެވިދާނޭކަމަށް މައްސޫދު ވަނީ ފާހަގަކުރައްވާފައެވެ.

Advertisement

އީރާނުގެ ރައީސް މައްސޫދު ޕެޒޭޝިއަން.. ފޮޓޯ: އޭއެފްޕީ

ރޮއިޓާސްއިން ބުނާގޮތުގައި ނިއުކްލިއާ މައްސަލާގައި އީރާނުން ގޮތްދޫނުކޮށްފިނަމަ ޓްރަމްޕް ވަނީ އީރާނަށް ބޮން އަޅާނޭކަމުގެ އިންޒާރު ދެއްވާފައެވެ. 

"އީރާނުން ނިއުކްލިއާ އެއްބަސްވުމުގެ ވާހަކަތަކައިގެން ކުރިއަށް ނުދާނަމަ ބޮން އަޅާނަން. އެކަން ވާނީ މީގެ ކުރިން އެމީހުންނަށް ފެނިފައިނުވާފަދަ ގޮވުންތަކަކަށް" ބައެއް މީޑިއާ ތަކާ ވާހަކަދައްކަމުން ޓްރަމްޕް ވިދާޅުވިއެވެ.

ބައެއް މީޑިއާތަކުން ވަނީ އެމެރިކާއިން ޑިއޭގޯ ގާސިއާ ސަރަހައްދަށް އިތުރު ސިފައިންނާއި ހަތިޔާރުތައް ޖަމާކުރަމުންދާކަމަށް ބުނެފައެވެ. ބޭނުމަކީ އީރާނުން ދީފާނެ ހަމަލާއަކުން ދިފާއުވުމުގެ އިތުރުން ރައްދުދިނުމެވެ. މިކަމާ ގުޅިގެން އީރާނުގެ ނޭވީ ކޮމާންޑަރު އަލިރޭޒާ ތަންގްސީރީ ވަނީ އީރާނަށް ހަމަލާދީފިނަމަ ސަލާމަތްވެގެން ނުދެވޭނެކަމަށް އިންޒާރުދެއްވާފައެވެ. 

" އެމީހުން ފަހާ މެކްސިކޯ ކަނޑަށް ދާންޖެހުނުކަމުގައި ވީނަމަވެސް އެކަންކުރާނަން" އީރާނުގެ ނޭވީ ކޮމާންޑަރު ވިދާޅުވެފައިވާކަމަށް މެދުއިރުމަތީގެ ބައެއް ނޫސްތަކުން ރިޕޯޓްކުރިއެވެ.

އެމެރިކާއިން މިފަހުން އީރާނަށް ދެމުން އަންނަ އިންޒާރުތައް އިތުރުވެފައިމިވަނީ މައިގަނޑު ދެ މައްސަލައަކާ ގުޅިގެންނެވެ. އެއީ ރަތްކަނޑުން ދަތުރުކުރާ އިސްރާއީލަށް ނިސްބަތްވާ ބޯޓުތަކަށް ހޫތީން ހަމަލާތައް ދިނުމުގައި އީރާނުން މަދަދުވެރިވުމާއި، ނިއުކްލިއާ މަޝްރޫޢު އެޤައުމުން ފުޅާކުރަމުންދާތީއެވެ.

މިކަމާ ގުޅޭގޮތުން އީރާނުން ބުނެފައިވަނީ، ހޫތީންނަށް އެހީވުމުގެ ސިޔާސަތަކީ އެމެރިކާއާ ބެހެވޭނޭ ކަމެއްނޫންކަމަށާއި އެއީ އީރާނުގެ އަމިއްލަ ހާރިޖީ ސިޔާސަތެއް ކަމަށެވެ. ނިއުކްލިއާ މަޝްރޫޢުއާ ބެހޭގޮތުން އީރާނުން ބުނެފައިވަނީ، ނިއުކްލިއާ ޤާބިލުކަން އިތުރުކުރުމުގެ ހައްޤު އެމެރިކާއެކޭ އެއްގޮތަށް އީރާނަށްވެސް ލިބިގެންވާކަމަށެވެ.