މިހާރު ކުރިއަށްދާ "ރިލެކްސް ކަމަނަ ސޯސަން ފުޓްސަލް ކަޕް 2025" ގެ ގްރޫޕް ބީގައި ރޭ ކުޅުނު ފުރަތަމަ މެޗުގައި ރިޕްޓައިޑްސް އާއި އެންމެ ފަހުގެ ޗެންޕިއަން ހެލޯ ބޭބީ ވާދަކުރި މެޗު ފަސޭހަކަމާއެކު 17-3 ގެ ތަފާތުބޮޑު ނަތީޖާއަކުން މޮޅުވެ ހެލޯ ބޭބީ އިން އެޓީމުގެ ފެންވަރު ދައްކާލައިފިއެވެ.

މުބާރާތުގައި ހެލޯ ބޭބީ ކުޅުނު ފުރަތަމަ މެޗުގައި އެފްސީ އަމިގޯސް އާއި ވާދަކޮށް 2-2 ގެ ނަތީޖާއަކުން ދެޓީމު އެއްވަރުވެފައިވާއިރު، މިއީ ރިޕްޓައިޑްސް އިން މުބާރާތުގައި ކުޅުނު ފުރަތަަމަ މެޗެވެ. 

މުޅި މެޗުގައި ވެސް މޮޅަށް ކުޅެ ހެލޯ ބޭބީ އިން މެޗު ޑޮމިނޭޓްކުރި އިރު ފުރަތަމަ ހާފުގެ ކުޅުން ނިމިގެންދިޔައީ ނުވަ ލަނޑުގެ ލީޑަކާއެކު 10-1 ގެ ނަތީޖާއަކުން ހެލޯ ބޭބީ ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި އެޓީމުން އިތުރު ހަތް ލަނޑު ކާމިޔާބުކުރިއިރު، މިހާފުގައި ރިޕްޓައިޑްސް އިން ވެސް ވަނީ އިތުރު ދެލަނޑު ކާމިޔާބުކޮށްފައެވެ.

އެގޮތުން މިމެޗުގައި ހެލޯ ބޭބީގެ އަހުނަފް ރަޝީދު ހަ ލަނޑު ކާމިޔާބުކޮށް ޑަބަލް ހެޓްރިކް ހެދިއިރު، އެޓީމުގެ ނަޝާހު އަހުމަދު ވަނީ ހަތަރު ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ މުހައްމަދު ދާނިޝް އަދި އިސްމާއިލް މުނީޒް މިއިން ކޮންމެ ކުޅުންތެރިއަކު ދެލަނޑު ކާމިޔާބުކުރިއިރު، އެޓީމުގެ އިބްރާހިމް ޝައުފު، ހާޒިމް ފައުޒީގެ އިތުރުން  އިސްމާއިލް ރަޔާން މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ރިޕްޓައިޑްސްގެ ހަސަން ނާއިފް އައްބާސް ދެލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ އަހުމަދު ރާއިފް އައްބާސް އެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ހެލޯ ބޭބީގެ އަހުނަފް ރަޝީދު އެވެ.

މިނަތީޖާއެކު ކުޅުނު ދެމެޗުން ހެލޯ ބޭބީއަށް ހަތަރު ޕޮއިންޓް ލިބިފައިވާއިރު، އެޓީމު މިވަގުތު އޮތީ ލަނޑުގެ ތަފާތުން ގުރޫޕްގެ އެއްވަނައިގައެވެ. އަދި މިމެޗުން ބަލިވި ރިޕްޓައިޑްސް މިވަގުތު އޮތީ ޕޮއިންޓެއް ނުލިބި ގުރޫޕްގެ ފުލުގައެވެ. 

މާރިޗު 2025 އިން 4 އެޕްރީލް 2025 ގެ ނިޔަލަށް ކުރިއަށް ގެންދާ މިމުބާރާތުގެ ޗެންޕިއަން ޓީމަށް 50،000 އަދި ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، މިއަހަރު މުބާރާތުގައި ޖުމްލަ 10 ޓީމަކުން ވަނީ ބައިވެރިވެފައެވެ

މިމުބާރާތުގެ މެއިން ސްޕޮންސަރ އަކަށް "ރިލެކްސް ކަމަނަ" ފެރީ ސާރވިސް ހަމަޖައްސާފައިވާއިރު، މުބާރާތުގެ ކޯ ސްޕޮންސަރއަކީ ތޮއްޑޫ ކައުންސިލް އެވެ. އަދި މުބާރާތުގެ އޮފިޝަލް މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް ސްޕޯޓްސް އެވެ.