ޣައްޒާގައި އިސްރާއީލުން ދެމުންގެންދާ ހަމަލާތަކުގައި އީދުލް ފިޠުރުގެ ދެވަނަ ދުވަހު ވެސް މަދުވެގެން 22 ފަލަސްތީނުން ޝަހީދުވެއްޖެއެވެ.

އެގޮތުން، ޣައްޒާގެ އުތުރުގައި އޮންނަ ޖަބާލިޔާގައި ޑްރޯން ހަމަލާއަކުން ދެ މީހުން ޝަހީދުވިއެވެ. އަދި މެދު ޣައްޒާގައި ވަކިވަކި ދެ ހަމަލާއެއްގައި އިތުރު ފަސް މީހުން ޝަހީދުވެފައިވެއެވެ. މީގެ ތެރޭގައި ދެއިރުލް ބަލަޙްގައި ދިން ހަމަލާއަކާއި ނުސެއިރާތު ރެފިއުޖީ ކޭމްޕުގެ ހުޅަނގު ފަރާތުގައި ދިން ހަމަލާއެއް ހިމެނެއެވެ.

މީގެ އިތުރުން އަލް-މަޣާޒީ ރެފިއުޖީ ކޭމްޕުގެ އިރުމަތީގައި އިސްރާއީލުގެ ޑްރޯން ހަމަލާއަކުން ތިން ދަނޑުވެރިން ޝަހީދުވެފައިވާ ކަމަށް ހެކިން ބުނެއެވެ.

ދެކުނު ޣައްޒާގައި ޚާން ޔޫނިސްގެ ގެއަކަށް ދިން ހަމަލާއެއްގައި ހަ މީހުން ޝަހީދުވެ، އެހެން ބަޔަކަށް އަނިޔާވެފައިވެއެވެ. އަދި އަބަސާންގައި ނައްޖާރު ޢާއިލާގެ ގެއަކަށް ދިން ހަމަލާއެއްގައި އިތުރު ދެ މީހުން ޝަހީދުވިއެވެ.

ޚާން ޔޫނިސް ރެފިއުޖީ ކޭމްޕުގައި ވަކި ހަމަލާއެއްގައި ހަތަރު މީހުން ޝަހީދުވެފައިވާ ކަމަށް ރިޕޯޓުކުރެވެއެވެ.

އީދުގެ ފުރަތަމަ ދުވަހު އިސްރާއީލުގެ ހަމަލާތަކުގައި މަދުވެގެން 64 ފަލަސްތީނުން ޝަހީދުވިއެވެ.

މާރޗް 18 ގައި އިސްރާއީލުން ފެށި ވައިގެ ހަމަލާތަކުގައި މިހާތަނަށް 920 އަށްވުރެ ގިނަ މީހުން ޝަހީދުވެ، 2،000 އަށްވުރެ ގިނަ މީހުންނަށް އަނިޔާވެފައިވެއެވެ.

އަދި 2023 ގެ އޮކްޓޯބަރުން ފެށިގެން މިހާތަނަށް 50،200 އަށްވުރެ ގިނަ ފަލަސްތީނުން ޝަހީދުވެފައިވެއެވެ. މީގެ ތެރެއިން ގިނައީ އަންހެނުންނާއި ކުޑަކުދިންނެވެ. އަދި 114،000 އަށްވުރެ ގިނަ މީހުންނަށް އަނިޔާވެފައިވެއެވެ.