Advertisement

ޣައްޒާގައި ފުށް ހުސްވެ، ބޭކަރީތައް ބަންދުކުރަން ޖެހިއްޖެ

ޣައްޒާގެ ބޭކަރީތައް ބަންދު ކޮށްފައި: ފޮޓޯ/ އަލްޖަޒީރާ

ނިރުބަވެރި އިސްރާއީލުން ޣައްޒާއަށް ކާބޯތަކެތި ފޯރުކޮށްދިނުމުގެ މަގުތައް ބަންދު ކުރުމުގެ ސަބަބުން ކާބޯތަކެތީގެ ތަކެތި ހުސްވަމުންދާ ކަމަށާއި، ފުށް ނެތުމުގެ ސަބަބުން ހުރިހާ ބޭކަރީތަކެއް ބަންދުކުރަން ޖެހިފައިވާ ކަމަށް އަލްޖަޒީރާއިން ރިޕޯޓްކޮށްފިއެވެ.

އިސްރާއީލުން ގާޒާގެ ބޯޑަރުތައް ބަންދުކޮށްފައިވާތާ 31 ދުވަސް ވެއްޖެއެވެ. މިއީ މި ޤަތުލްޢާއްމު ފެށުނު ފަހުން އެންމެ ދިގު މުއްދަތަށް ބޯޑަރުތައް ބަންދުކޮށްފައިވާ ފަހަރެވެ. މި މުއްދަތުގައި ކާނާ، ރޮށި، ފުށް، ބޭސް، ތެޔޮ އަދި ކައްކާ ގޭސް ފަދަ އެއްވެސް އެއްޗެއް ޣައްޒާގެ އެތެރެއަށް ވެއްދިފައި ނުވާ ކަމަށް އަލްޖަޒީރާއިން ރިޕޯޓް ކުރެއެވެ. 

ޣައްޒާގެ ބޭކަރީތައް ބަންދު ކޮށްފައި: ފޮޓޯ/ އަލްޖަޒީރާ

އޭގެ ސަބަބުން ކާބޯތަކެތި ލިބުމުގައި ދިމާވެފައިވާ ދަތިތަކާއެކު ޣައްޒާގައި ބަނޑުހައިހޫނުކަމުގެ ހާލަތެއް ކުރިމަތިވެދާނެ ކަމަށް ފަލަސްތީނުގެ ސިވިލް ޑިފެންސްއިން ވަނީ އިންޒާރުދީފައެވެ. އަދި ޣައްޒާގައި ކާނާ ފުދޭވަރަށް ހުރި ކަމަށް އިސްރާއީލުން ބުނާ ބުނުމަކީ "މަލާމާތެއް" ކަމަށް އދ. އިން ބުނެފައިވެއެވެ.

ޣައްޒާގެ ބޭކަރީތައް ބަންދު ކޮށްފައި: ފޮޓޯ/ އަލްޖަޒީރާ

އިސްރާއީލުގެ ހަމަލާތަކުގައި އަންގާރަ ދުވަހު ޣައްޒާގެ އެކި ސަރަހައްދުތަކުން މަދުވެގެން 21 މީހުން ޝަހީދުވެފައިވާ ކަމަށް ރިޕޯޓުތަކުގައި ވެއެވެ. އަދި އުތުރު ޣައްޒާގެ ބައިތް ހަނޫން، ބައިތް ލަހިޔާ ސަރަހައްދުތަކުގައި ދިރިއުޅޭ މީހުން ވަގުތުން އެ ސަރަހައްދުތައް ދޫކޮށް ދިއުމަށް އިސްރާއީލުގެ ސިފައިން އަމުރުކޮށްފައިވެއެވެ.

މި ދަނޑިވަޅުގައި، ހިއުމަން ރައިޓްސް ވޮޗް އާއި އެހެނިހެން ޖަމްޢިއްޔާތަކުން ވަނީ އިސްރާއީލުގެ ބެންޖަމިން ނެތަންޔާހޫ ހަންގޭރީއަށް ޒިޔާރަތްކުރާއިރު، އޭނާ ހައްޔަރުކުރުމަށް އިންޓަރނޭޝަނަލް ކްރިމިނަލް ކޯޓުގެ އަމުރަށް ތަބާވުމަށް ހަންގޭރީއަށް ގޮވާލާފައެވެ.

Advertisement

ކޮމެންޓް

Advertisement

Advertisement