Advertisement

އީރާނަށް ހަތިޔާރު ފޯރުކޮށްދޭ ފަރާތްތަކަށް އެމެރިކާއިން ފިޔަވަޅު އަޅައިފި

02 Apr 2025 | 13:41
އީރާންގެ ހަތިޔާރުތަކެއް.. ފޮޓޯ

އީރާނަށް ހަތިޔާރު ފޯރުކޮށްދޭ އިތުރު ފަރާތްތަކަކަށް އެމެރިކާއިން ދަތިކުރުމުގެ ފިޔަވަޅު އެޅިކަން އިއުލާންކޮށްފިއެވެ.

އެމެރިކާއިން މިފަހަރު ދަތިކުރުމުގެ ފިޔަވަޅު އަޅާފައިވަނީ އީރާން، ޔުނައިޓެޑް އަރަބް އެމިރޭޓްސް އަދި ޗައިނާގެ ބައެއް ފަރާތްތަކާ ދެކޮޅަށެވެ. އަންގާރަ ދުވަހު އިއުލާންކުރި ދަތިކުރުމުގެ ފިޔަވަޅުތައް އެޅި ފަރާތްތަކަކީ އީރާނުގެ ޑްރޯން އުފައްދާ ކުންފުންޏަކަށް ބޭނުންވާ ތަކެތި ސަޕްލައިކުރާ ފަރާތްތަކެވެ.

އެމެރިކާގެ ޓްރެޜަރީއާއި ޖަސްޓިސް ޑިޕާޓްމަންޓް ގުޅިގެން އެޅި މިފިޔަވަޅުތަކާ ގުޅިގެން ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވީ އީރާނުގެ ޑްރޯންތައް މެދުއިރުމަތީގައިވާ އީރާނުގެ ޕްރޮކްސީންނަށާއި، ރަޝިޔާއަށް ފޯރުކޮށްދިނުމުގެ ސަބަބުން، އެމެރިކާއާއި އެމެރިކާގެ ސިފައިންނަށާއި، އެމެރިކާގެ ބައިވެރިންނަށް ނުރައްކާވާ ކަމަށެވެ. އީރާނުގެ ޕްރޮކްސީންގެ ގޮތުގައި އެމެރިކާއިން ސިފަކުރަނީ ޔަމަނުގެ ހޫޘީންނާއި، ލުބްނާނުގެ ހިޒްބުﷲ އެވެ.

Advertisement

އެމެރިކާއިން ތުހުމަތުކުރާ ގޮތުގައި އީރާނުން އަންމޭންޑް އޭރިއަލް ވެހިކަލް – ނުވަތަ ޑްރޯންތައް އުފެއްދުމުގެ މަސައްކަތް ހަވާލުކޮށްފައިވާ އެއް ކުންފުނިކަމަށްވާ ޝާހިދު ބަކަރީ އިންޑަސްޓްރިއަލް ގްރޫޕަށް ބޭނުންވާ މޯޓަރުތައް، އެހެން ކުންފުންޏެއް މެދުވެރިކޮށް އީރާނަށް ވިއްކަނީ ޗައިނާގެ ޒީބޯ ޝެންބޯ މެޝިނެލެކްޓްރީނިކްސް ކޮމްޕެނީ ލިމިޓެޑުންނެވެ.

އާދީއްތަ ދުވަހު އެމެރިކާގެ ރައީސް ޑޮނަލްޑް ޓްރަމްޕް ވަނީ، އީރާނުގެ ނިއުކްލިއަރ ޕްރޮގްރާމްގެ މައްސަލައިގައި މަޝްވަރާގެ މޭޒުދޮށަށް އީރާނުން ނައިސްފިނަމަ އިތުރު ދަތިކުރުމުގެ ފިޔަވަޅުތައް އަޅާނެކަމުގެ އިންޒާރު ދެއްވާފައެވެ

Advertisement

ކޮމެންޓް

Advertisement

Advertisement