ގދ. ހޯނޑެއްދޫގެ އެކިތަންތަނުގައި އަލިފާން ރޯކުރުން އާންމުވެފައިވާތީ، މިއަދުން ފެށިގެން އެފަދަ ޢަމަލުތައް ހިންގާ ފަރާތްތަކާ މެދު ފިޔަވަޅު އަޅާނެކަމަށް އެރަށު ކައުންސިލުން ބުނެފިއެވެ.

ކައުންސިލުން މިކަމާ ގުޅިގެން ކަންބޮޑުވުން ފާޅުކޮށް އިއްޔެ ނެރުނު އިޢުލާނުގައި ބުނީ، މިކަމަކީ އަލިފާނުގެ ނުރައްކާތެރި ހާދިސާތައް ހިނގުމަށް މަގުފަހިވެދާނެ ޢަމަލެއް ކަމަށެވެ.

އަދި މިކަމުގެ ސަބަބުން ދަނޑުބިންތަކާއި ރައްޔިތުންގެ ރުއްގަހާއި މުދަލަށް ބޮޑެތިގެއްލުން ތަކެއް ލިބިގެންދިއުމުގެ ފުރުޞަތު އޮތް ކަމަށެވެ.

މީގެ އިތުރުން އަލިފާން ރޯކޮށް، އެ އަލިފާނުގެ ސަބަބުން އުފެދޭ ދުމުން އަވަށްޓެރިންނަށް އުނދަގޫވާގޮތަށް އަލިފާން ރޯކުރުމަކީ ގަވާއިދު ނަންބަރު: 2019/R-995 (އާންމު އުނދަގުލާބެހޭ ގަވާއިދު) ގެ ދަށުން މަނާކަމެއްކަންވެސް އެންމެހައި ފަރާތްތަކުގެ ސަމާލުކަމަށް އެ ކައުންސިލުން ވަނީ ގެނެސްފައެވެ. 

އެހެންކަމުން، އެ ގަވާއިދާއި ޚިލާފަށް އެކަށީގެންވާ ރައްކައުތެރިކަމުގެ ފިޔަވަޅު އެޅުމެއްނެތި، އާންމު ތަންތާގައި އަލިފާން ރޯކުރުމަކީ މަނާކަމެއްކަމުގައިވާތީ، ހޯނޑެއްދޫގެ އެއްވެސް ތަނެއްގައި ގަވާއިދާ ޚިލާފަށް ރޯކުރާ ފަރާތްތަކާމެދު އެ ގަވާއިދުގެ ދަށުން ފިޔަވަޅު އަޅަމުންދާނެ ކަމުގެ އިންޒާރު ކައުންސިލުން ވަނީ ދީފައެވެ.